Dumengia, il 1. da settember 2024, envidan la baselgia refurmada e la baselgia catolica dal chantun Grischun la populaziun ad in Bundstag cuminaivel, ecumenic e festiv. Il program multifar empermetta ina festa solenna e divertenta.
La fundaziun dal Stadi liber da las Trais Lias avant 500 onns n'è betg mo stà in act politic. Ils 1524 artitgels da Glion ch'èn vegnids suttascrits cumpigliavan er disposiziuns exactas davart la religiun ed han fullà via per il moviment da refurma. L'istorgia dal Grischun è pia er l'istorgia da la baselgia. In bun motiv per las baselgias da sa participar l'onn da giubileum a las festivitads commemorativas e da sa regurdar da la toleranza e da las valurs cuminaivlas.
Servetsch divin ecumenic, cun transmissiun directa, baselgia refurmada, a las 10.00
Lantschà vegn il di cun in servetsch divin ecumenic, che vegn producì dad RTR e transmess live dad SRF e da RSI.
Salids, apero riche e concerts sin la plazza davant la Chesa Planta, a las 11.15
Suenter ils salids dal president da la Regenza Jon Domenic Parolini e da represchentants da las duas baselgias chantunalas vegnan tut las visitadras ed ils visitaders envidads cordialmain ad in apero riche.
«Glaube-Fede-Cretta» – l'exposiziun ambulanta da las baselgias
En tge crain las Grischunas ed ils Grischuns oz? Discurrer da l'atgna cardientscha, è in tabu. Catolicas e refurmads, scepticras e crettaivels, giuven e vegl, persunas enconuschentas e nunenconuschentas da l'entir chantun Grischun èn s'occupads da la dumonda provocativa e partan lur patratgs. Suenter il Bundstag è l'exposiziun ambulanta «Glaube-Fede-Cretta» sin viadi tras l'entir Grischun. Las datas èn publitgadas sin https://500.gr.ch/glaube_fede_cretta.
«Deus in Burnout» – in cabaret
Il cabaret satiric-filosofic da e cun il Bregagliot Luca Maurizio tematisescha la promoziun da la libertad da religiun sin plaun communal e la separaziun da la baselgia e dal stadi. La cumparegliaziun tranter ier ed oz mussa, che l'idea fixa da l'uman d'optimar tut, chaschuna ina crisa suenter l'autra e che Dieu è curt avant in burnout. A chaschun dal Bundstag e suenter la turnea tras il chantun Grischun maina Luca Maurizio il public sin in viadi fantastic, imprevisibel e divertent. Ulteriuras infurmaziuns stattan a disposiziun sin https://500.gr.ch/deus-in-burnout.
Las activitads da la festa a Samedan vegnan cumplettadas cun prelecziuns, visitas guidadas scenicas dal vitg ed in program per uffants. Il program detaglià è publitgà en l'agiunta sco er sin https://500.gr.ch/bundstag-kirchen.
I vegn cusseglià da viagiar cun il traffic public. Grazia a la purschida «simpel per retour» pajais Vus ils dis dal Bundstag mo il viadi per ir a Samedan. Il viadi da return è gratuit fin al lieu da partenza en il Grischun.
Ulteriurs Bundstags e bleras activitads da giubileum
Ulteriurs Bundstags han lieu ils 7 da settember 2024 a Cuira, ils 14 da settember 2024 a Poschiavo ed ils 6 d'october 2024 en la Val Müstair.
Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.
Agiuntas:
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch
Dumondas en connex cun il Bundstag a Samedan:
- Paolo Tonigna, manader dal project «Bundstag da las baselgias», reverenda e president da las baselgias da la regiun Bernina-Malögia, tel. +41 79 413 84 12, e‑mail paolo.tognina@gr-ref.ch
Responsabladad: Departament d'educaziun, cultura e protecziun da l'ambient