Il cusseglier federal Beat Jans è sa scuntrà venderdi cun represchentants dal Departament da giustia, segirezza e sanadad en il Grischun. Ensemen cun il cusseglier guvernativ Peter Peyer ha il cusseglier federal Jans visità structuras da collocaziun e d'integraziun da l'Uffizi da migraziun e da dretg civil en il Partenz ed en la Val dal Rain Grischuna. Il program ha cuntinuà cun in discurs da lavur tranter il cusseglier federal Beat Jans ed il cusseglier guvernativ Peter Peyer sco er Claudio Riedi, l'emprim procuratur public dal chantun Grischun, Walter Schlegel, il cumandant da la Polizia chantunala dal Grischun e Markus Haltiner, il manader da l'Uffizi da migraziun e da dretg civil.

Tematisadas èn vegnidas tranter auter differentas novas regulaziuns en il sectur d'asil, la collavuraziun interchantunala da la polizia, la gronda chargia da la giustia penala sco er la collavuraziun da las autoritads da persecuziun penala chantunalas e federalas.

Il suentermezdi ha l'Uffizi da migraziun e da dretg civil preschentà al cusseglier federal Beat Jans a Schiers la purschida transitorica «lingua ed integraziun per giuvenils da lingua estra». Suenter ha la delegaziun da Berna visità il center da transit Bahnhöfli a Trimmis.

«Asil e migraziun èn incumbensas da la cuminanza. La Confederaziun, ils chantuns e las vischnancas èn responsabels cuminaivlamain e ston collavurar stretgamain per dumagnar las sfidas. Tant pli appreziesch jau il bun dialog ed il grond engaschament da tut las persunas participadas», ha exprimì il cusseglier federal Beat Jans. «Il barat cun il cusseglier federal Beat Jans sco schef dal Departament federal da giustia e polizia è fitg prezius. Er per temas difficils pudain nus tschertgar cuminaivlamain soluziuns», ha ditg il cusseglier guvernativ Peter Peyer.

Fotografia agiuntada:

Da sanestra: Felix Birchler (manader dal post spezialisà per l'integraziun), Markus Haltiner (manader da l'uffizi da migraziun e da dretg civil), cusseglier federal Beat Jans, cusseglier guvernativ Peter Peyer, Regula Hunger (secretari general dal departament da giustia, segirezza e sanadad), Valentin Luzi (president da l'uniun Palottis), Werner e Marianne Egli cun sia figlia Melina (pèr fittadin Hof Palottis) e Jann Andri Thöny (manader da la scola e da l'internat)

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, e‑mail Peter.Peyer@djsg.gr.ch

Responsabladad: Departament da giustia, segirezza e sanadad