L'onn 2023 ha l'Agid a victimas dal Grischun cusseglià tut en tut 869 victimas da violenza. Il dumber da cussegliaziuns è s'augmentà er durant l'onn 2023. Quest svilup correspunda al trend naziunal.

La cussegliaziun da l'Agid a victimas sa drizza a persunas ch'èn vegnidas donnegiadas corporalmain, psichicamain u sexualmain tras in delict en Svizra. La cussegliaziun è gratuita, confidenziala e sin giavisch anonima. La cussegliaziun stat a disposiziun a tut las persunas pertutgadas, independentamain da la vegliadetgna, da l'orientaziun sexuala, da l'identitad sexuala u da l'appartegnientscha religiusa. Medemamain n'emporti betg, da tge pajais ch'ina persuna pertutgada deriva, sch'ella è domiciliada a lunga vista en Svizra u en tge chantun ch'ella abita. En cas da basegn consulteschan las persunas spezialisadas da l'Agid a victimas servetschs d'interpretaziun e sa drizzan als basegns da las victimas.

In record da novas annunzias e dal dumber da cussegliaziuns
L'onn 2023 èn 508 persunas sa drizzadas a l'Agid a victimas dal Grischun. Quai èn 208 novas annunzias dapli che l'onn avant. Ensemen cun ils cas da cussegliaziun existents ha l'Agid a victimas dal Grischun sustegnì l'onn 2023 circa 869 persunas.

Circa 100 novas annunzias èn d'attribuir ad in'adattaziun da la registraziun statistica. Tuttina cuntinuescha la tendenza da blers onns, ch'i vegn fatg diever pli savens da cussegliaziuns da l'Agid a victimas dal Grischun. Persunas spezialisadas partan dal fatg, che l'augment da las cussegliaziuns da l'Agid a victimas derivia er d'ina pli ferma sensibilisaziun da la populaziun. Auters motivs n'èn betg d'excluder, indizis u mussaments concrets na datti actualmain dentant betg.

Entant che 65 pertschient da las cussegliaziuns han pudì vegnir terminadas entaifer in onn, datti er cussegliaziuns che duran pli ditg, quai pervia da proceduras penalas da plirs onns e pervia d'in basegn da terapia pli lung.

GRAFICA 1: Svilup dals dumbers da cas
Post da cussegliaziun per l'agid a victimas dal Grischun, Svilup dals dumbers da cas dal 2015 fin 2023
*Adattaziun da la registraziun statistica l'onn 2023

Vinavant in grond dumber da cussegliaziuns en connex cun violenza a chasa
Stgars la mesadad da las persunas pertutgadas da violenza ch'èn sa drizzadas a l'Agid a victimas, han subì violenza fisica, psichica u sexuala en la famiglia u en il partenadi. En quest connex vegni rapportà il pli savens da fatgs da violenza cun plirs causals penals. Betg darar s'augmenta l'intensitad da la violenza e la frequenza, sche la persuna pertutgada ha l'intenziun da sa separar. Ina cussegliaziun da persunas spezialisadas da l'Agid a victimas vegn perquai recumandada en questas situaziuns gia avant ch'ins communitgescha ina intenziun da sa separar, en spezial sch'ins ha tema d'ina escalaziun violenta.

La quota da delicts sexuals e da violenza sexuala envers creschids ed uffants è auta
En 35 pertschient dals cas rapportan las persunas che tschertgan cussegl tar l'Agid a victimas dal Grischun, da blessuras corporalas e/u da violenza. En 22 pertschient dals cas rapportan questas persunas d'extorsiuns, da smanatschas u da constricziuns. 24 pertschient da las persunas che tschertgan cussegl inditgeschan, ch'ellas sajan pertutgadas da violenza sexuala. En 62 pertschient da quests cas sa tracti da violenza sexuala envers creschids, en 37 pertschient dals cas da violenza envers uffants ed en in pertschient dals cas da violenza envers persunas dependentas.

GRAFICA 2: Post da cussegliaziun per l'agid a victimas dal Grischun
Delicts rapportads en las cussegliaziuns durant il 2023 en %
Frequenza dals delicts rapportads en pertschient (las victimas pon mintgamai numnar plirs delicts)

En situaziuns acutas èsi impurtant, che las victimas sa drizzian a la centrala d'alarm da la polizia. Ultra da quai datti en il Grischun purschidas sco la Chasa da dunnas dal Grischun, il «Schlupfhaus» da l'Ospital d'uffants dal Grischun u l'ura da consultaziun Forensic Nursing en l'Ospital chantunal dal Grischun per persunas pertutgadas da violenza.

L'Agid a victimas è occupà durant las uras da biro ordinarias. En situaziuns acutas porscha el in termin da cussegliaziun entaifer 24 uras. Ultra da las emprimas mesiras cumpiglia la cussegliaziun en ina situaziun da crisa er l'agid psicologic e giuridic sco er infurmaziuns. En cas da basegn vegnan intermediadas persunas spezialisadas dal sectur medicinal, terapeutic e giuridic.

Ulteriuras infurmaziuns davart l'Agid a victimas chattais Vus sin la pagina d'internet da l'Uffizi dal servetsch social.

Infurmaziuns:

Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 09.00 fin las 11.00), e‑mail Susanna.Gadient@soa.gr.ch