Cun contribuziuns d'assistenza mensilas vul il chantun Grischun sustegnair persunas maiorennas che porschan assistenza a confamigliars u a persunas da referiment. Confurm al princip da la politica da sanadad «ambulant avant staziunar» po l'introducziun da questas contribuziuns impedir u almain retardar collocaziuns en chasas da tgira. La Regenza ha tramess en consultaziun ina revisiun parziala correspundenta da la Lescha per promover la tgira da persunas malsaunas.
Sin fundament dal Program da la Regenza 2021–2024 ha l'Uffizi da sanadad dal Grischun elavurà mesiras per distgargiar ed indemnisar las persunas che tgiran ed assistan lur confamigliars e publitgà questas mesiras en in plan d'acziun. En connex cun la distgargia finanziala da confamigliars u da persunas da referiment prevesa il plan d'acziun d'introducir en l'entir chantun contribuziuns d'assistenza mensilas. Questa contribuziun d'assistenza duai importar 300 fin 600 francs per mais. La Regenza po fixar l'import definitiv.
Questa revisiun parziala ha l'intent da reglar las modalitads per pajar las contribuziuns d'assistenza mensilas. Ils artitgels da lescha reglan la cumpetenza e l'autezza da las contribuziuns, las premissas per survegnir contribuziuns, la dumonda e la decisiun, il cumenzament e la durada dal dretg da contribuziuns sco er l'obligaziun da cooperaziun, l'obligaziun d'annunzia e la restituziun. Sin fundament da las supposiziuns da l'Uffizi da sanadad dastgassan las expensas importar maximalmain 2,4 milliuns francs per onn.
Igl è planisà da metter en vigur la revisiun parziala per il 1. da schaner 2027. Quest temp dovri per realisar tecnicamain las midadas.
Ils documents da consultaziun èn ussa disponibels
La consultaziun dura dals 28 d'avust 2024 fin ils 28 da november 2024. Ils documents respectivs èn disponibels sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel mesemna, ils 28 d'avust, da las 08.30 fin las 09.30), e‑mail Peter.Peyer@djsg.gr.ch
Responsabladad: Regenza