Dals 7 fin ils 8 da settember 2024 organiseschan la Tgira da monuments dal Grischun e la Protecziun da la patria ensemen cun differentas organisaziuns partenarias ils Dis europeics dal patrimoni. Las occurrenzas, las visitas guidadas ubain ils lavuratoris da quest onn en il Grischun dattan l'occasiun da scuvrir – sut il motto «Crear raits» – edifizis, quartiers u museums istorics e d'emprender ad enconuscher – cun in guid professiunal – chaussas captivantas, novas ed imprevisas.

Ils Dis europeics dal patrimoni dals 7 ed ils 8 da settember 2024, èn deditgads al motto «Collià» e mussan, tge che influenzescha noss patrimoni cultural. Il program da quest onn reunescha persunas ed identifitgescha las vias, co che innovaziuns, ideas u rauba èn arrivadas en noss chantun sur ils pass da transit, sur sendas da cuntrabanda u grazia a viagiaturas e viagiaturs, e co ch'ellas han caracterisà la cultura da nossa vita.

15 occurrenzas en l'entir chantun
Sut il motto «Clima, biodiversitad, cultura architectonica» preschenta la Protecziun da la patria sias ideas per in nov quartier Ruggenbrecher a Cuira. Grazia a la cumbinaziun da cultura architectonica, protecziun dal clima e mesiras da biodiversitad pudess quest quartier purtar ina plivalur a la glieud ed a la natira. Cun sias diversas occurrenzas lascha er la claustra Son Jon a Müstair sfunsar pitschen e grond en la cuntrada da cultura da la Val Müstair. Per exempel cun in tur divertent tras la claustra che vegn accumpagnà da Babette, il giat da la claustra, u cun l'exposiziun «Bun viadi – vias da ed a Müstair». Durant questa fin d'emna avran er las stivas extraordinarias dal Museum Engiadinais a San Murezzan sco er ulteriuras immobiglias istoricas lur portas, sco tranter auter il Chastè da Rehanau.

Pussaivladad da reservar plazzas
Tut las occurrenzas èn publicas e tut ils organisaturs sa legran da bleras visitadras e blers visitaders. Per tscherts puncts da program è il dumber da visitaders limità. Ulteriuras infurmaziuns e pussaivladads da reservar plazzas chattais Vus sin la pagina d'internet www.kulturerbe-entdecken.ch dal Post d'infurmaziun naziunal davart il patrimoni cultural (NIKE) u tar la Tgira da monuments dal Grischun.

Dapli infurmaziuns:

Plattafurma d'internet www.kulturerbe-entdecken.ch

Program Grischun

Fotografias agiuntadas:

Fotografia: San Murezzan Museum Engiadinais © Daniel Martinek, Grischun

Fotografia: Setmunt Beiva-Casaccia © Tgira da monuments dal Grischun

Fotografia: Bigl a Rehanau © Inventari Lisa Gensetter / Fundaziun grischuna per la fotografia

Infurmaziuns:

Simon Berger, tgirader da monuments, Tgira da monuments dal Grischun / Uffizi da cultura, E‑Mail Simon.Berger@dpg.gr.ch

Responsabladad: Uffizi da cultura