Gist en las regiuns perifericas dal Grischun sentan ins intensivamain l'impurtanza da las relaziuns cun il pajais vischin sco er la tgira da la lingua e da las isanzas. Al Bundstag a Poschiavo vegni preschentà, co che la reuniun da las Trais Lias ha influenzà e caracterisà il Puschlav. Ensemen cun la populaziun festivescha la vischnanca la vita e la cuminanza.

Cun pleds festivs dal cusseglier guvernativ Peter Peyer e dal president communal Giovanni Jochum cumenza il Bundstag a las 11.00 sin la plazza communala. Tras il sun dals zains e tras l'arrivada da trais curriers a chaval vegn la populaziun tuttenina clamada davant las autoritads per tadlar la proclamaziun uffiziala da la reuniun da las Trais Lias. E gia sa chattan ils giasts dal Bundstag amez il teater «Tre Leghe per la vita» (Trais Lias per la vita). Els vegnan integrads en quest spectacul e daventan quasi perditgas da la proclamaziun da la reuniun da las Trais Lias.

Teater d'in act «Tre Leghe per la vita», plazza communala, a las 11.30
L'onn 1524 è vegnida sigillada la Brev da federaziun, e ses cuntegns èn vegnids communitgads a la populaziun. La glieud da Poschiavo, ch'è vegnida clamada per tadlar, banduna las activitads quotidianas e vegn plain tensiun sin la plazza dal vitg. Al pe da la tribuna sa radunan chasarinas, pasterners, taglialaina, martgadants ed apotechers, ma er il nar dal vitg e l'amatur dal vin local. Il toc da teater da Gigliola Amonini finescha cun il marsch cuminaivel a la Via da Mez, nua ch'ina maisada vegn preparada per il gentar. Per il gentar vegni recumandà da cumprar in bigliet en la prevendita.

Conferenza «Trais Lias 1524. La forza da l'uniun», La Tor, a las 14.00
La conferenza da Saveria Masa mussa, tge che la reuniun da las Trais Lias signifitga per il chantun Grischun dad oz.

Visita guidada tras il vitg, martgà cun products locals e portas avertas dals museums
Ina visita guidada tras il center dal vitg da Poschiavo intermediescha chaussas interessantas ed infurmativas davart il vitg. Il lieu d'inscunter è a las 10.00 tar l'infopoint. I vegn supplitgà da s'annunziar. La visita guidada tras il vitg è en talian.

Da las 10.30 fin las 16.00 avran ils museums a Poschiavo lur portas ed envidan ad ina visita gratuita. Durant las medemas uras exponan e vendan commerziantas e commerziants lur products locals sin la Plaza dal Suisse. Cumediants e pajass procuran per divertiment sin las vias. In program d'uffants cumplettescha las festivitads.

Il program detaglià dal Bundstag Poschiavo chattais Vus sut https://500.gr.ch/dieta-poschiavo. I vegn cusseglià da viagiar cun il traffic public. Grazia a la purschida «simpel per retour» pajais Vus mo il viadi per ir al Bundstag. Il viadi da return è gratuit fin a Voss lieu da partenza en il chantun Grischun.

Ulteriur Bundstag e bleras activitads da giubileum
Suenter Poschiavo è l'ultim Bundstag ils 6 d'october 2024 en la Val Müstair. Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.

Agiuntas:

Flyer dal Bundstag Poschiavo
Program cun plan da situaziun
Fotografia: Vopna da las Trais Lias. Dal frontispizi dals Statuts da la Valtellina, stampà l'onn 1549 per incumbensa da las Trais Lias tar Dolfino Landolfi a Poschiavo

Infurmaziuns:

Dumondas en connex cun las festivitads da 500 onns:

• President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
• Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch

Dumondas en connex cun il Bundstag Poschiavo:

• Nicola Passini, manader dal project Bundstag Poschiavo, chanzlist communal da Poschiavo, tel. +41 79 673 78 73, e‑mail nicola.passini@poschiavo.ch