L'Uffizi federal d'ambient (UFAM) ha approvà cumplainamain la dumonda dal chantun Grischun per ina regulaziun proactiva. A partir da mesemna, ils 4 da settember 2024, vegnan las chatschadras ed ils chatschaders integrads en la regulaziun dal triep dal Vorab.
Ils 2 da settember 2024 ha il UFAM approvà cumplainamain la dumonda dal chantun Grischun. Perquai ha il chantun Grischun ordinà ils 3 da settember 2024, che maximalmain dus terzs dals lufs giuvens dastgan vegnir sajettads en quels trieps, nua che lufs giuvens èn vegnids confermads. Actualmain pertutga quai 22 lufs giuvens dals set trieps da Stagias, Moesola, Corn da Lantsch, Calderas, Muchetta, Fuorn ed Älpelti (guardar communicaziun a las medias dals 15-08-2024).
Plinavant vegni permess da sajettar tut ils animals dal triep dal Vorab en la regiun Foppa. A partir da mesemna, ils 4 da settember 2024, vegnan integrads – sco sustegn – er chatschadras e chatschaders autorisads en la regulaziun dal triep dal Vorab. Gia dapi il cumenzament da la chatscha auta han las chatschadras ed ils chatschaders ultra da quai la pussaivladad da sustegnair la surveglianza da chatscha tar la prelevaziun da dus lufs singuls en las regiuns Puschlav e Valragn.
Las cundiziuns pon vegnir consultadas a partir d'immediat sin la pagina d'internet da l'Uffizi da chatscha e pestga sut Rechtsgrundlagen > Vorschriften und Karten.
Las mesiras han la finamira da prevegnir a donns en l'agricultura sco er da mantegnair la timiditad dal luf envers l'uman. Tras la regulaziun dals trieps da lufs vegni plinavant impedì che las populaziuns da lufs creschian en moda nuncontrollada. La fasa da regulaziun dura fin ils 31 da schaner 2025.
Inoltrà ina segunda dumonda al UFAM
Pervia dal svilup dals conflicts en l'agricultura ha il chantun Grischun inoltrà ils 3 da settember 2024 ina segunda dumonda al UFAM per sajettar ils trieps da lufs dal Corn da Lantsch e dal Fuorn. En il territori dal triep dal Jatzhorn han ins pudì cumprovar er quest onn animals giuvens. Tras la cumprova d'animals giuvens han ins ultra da quai pudì confermar ch'in nov triep è sa furmà al Calanda en la regiun da cunfin cun il chantun Son Gagl. Per omadus trieps da lufs vegn inoltrada ina dumonda da regular ils animals giuvens, quai analogamain als ulteriurs trieps.
L'Uffizi da chatscha e pestga vegn mintgamai ad infurmar sin sia pagina d'internet davart ulteriuras ordinaziuns. En il «Monitoring dal management dal luf» vegnan plinavant publitgads mintga mais las cifras ed ils eveniments ils pli impurtants en connex cun la regulaziun.
Infurmaziuns:
Dr. Adrian Arquint, manader da l'Uffizi da chatscha e pestga, tel. +41 81 257 38 91 (cuntanschibel da las 17.00 fin las 17.45), e‑mail Adrian.Arquint@ajf.gr.ch
Responsabladad: Uffizi da chatscha e pestga