Quest onn ha il president da la Regenza Jon Domenic Parolini manà la Regenza en l'Engiadina Bassa. Ella ha visità sia vischnanca burgaisa da Scuol ed ha guardà tranter auter la Büvetta Tarasp, il bain Zuort cun la chaplutta Mengelberg sco er la baselgia a Tschlin. Plinavant ha la Regenza fatg ina visita guidada tras il chastè da Tarasp.

Per la sesida champestra da quest onn è la Regenza viagiada en l'Engiadina Bassa. L'emprim di ha ella visità l'hotel da cultura Scuol Palace, nua ch'ella è vegnida beneventada da la manadra artistica Cinzia Regensburger. Accumpagnada da la presidenta communala da Scuol, Aita Zanetti, e dal tgirader chantunal da monuments, Simon Berger, ha la Regenza visità silsuenter la Büvetta Tarasp. Suandà è in viadi, cumbinà cun ina curta spassegiada, en la Val Sinestra e la Val Laver fin al bain Zuort, nua che la Regenza ha guardà la chaplutta Mengelberg.

Il segund di han la cussegliera guvernativa ed ils cussegliers guvernativs sco er il chancelier explorà las aclas restauradas Chant Sura, quai en accumpagnament dal president communal da Valsot Victor Peer. Silsuenter èn els viandads sur la Val Ruinains fin a Tschlin, nua ch'els han visità la baselgia ensemen cun il president da la plaiv Duri Janett. Sco finiziun da la sesida champestra è stada sin il program ina visita guidada tras il chastè da Tarasp.

Fotografia agiuntada:

Infurmaziuns:

President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch