La Regenza ha approvà il project «Batschigl d'aua da stizzar fieu Chischnès» da la vischnanca da Sumvitg ed ha garantì ina contribuziun chantunala da maximalmain 364 000 francs per quest intent. Il project cumpiglia la construcziun d'in batschigl d'aua da stizzar fieu en il territori Chischnès sur Val. Las mesiras previsas correspundan al Concept chantunal da prevenziun cunter incendis da guaud 2030.

En il territori dal project n'existan nagins lieus da retratga d'aua natirals adattads, sco lais u auals, che permettessan – en cas d'in incendi da guaud – da retrair aua da stizzar fieu cun agid da helicopters, d'autos-cisterna u da pumpas. Perquai ston ins temair che l'Uaul Puzzastg ed ils guauds da protecziun vischins en la Val Sumvitg na pon betg pli ademplir suffizientamain lur funcziun da proteger ils abitadis e las vias da traffic situadas sutvart, sch'i dat in incendi da guaud. Quest project serva a meglierar l'infrastructura per cumbatter incendis da guaud ed uschia a segirar la funcziun da protecziun dal guaud.

Decisiv per il project è stà in deficit tar la protecziun cunter aua gronda per lung da la Landwasser en il quartier «Mühli» a Tavau Glaris. Là sa chatta er il trassé da la lingia da la Viafier retica. Durant las daratgadas da la stad 2020 han ins observà problems en il lieu, nua ch'il Chummerbach sbucca en la Landwasser. Tranter la Landwasser ed il trassé da viafier exista gia in mir da protecziun cunter aua gronda, che n'è dentant betg lung ed aut avunda per cuntanscher las finamiras da protecziun. Perquai duai il mir vegnir auzà en etappas e prolungà giudim per var 20meters. Ultra da quai èn las fortificaziuns existentas dal letg da l'aual donnegiadas fermamain. Ellas duain perquai vegnir remplazzadas cumplettamain tras ina nova construcziun da var 40meters lunghezza, ch'è accessibla per ils peschs.

La Regenza ha concedì a la secziun Piz Terri dal Club alpin svizzer (CAS) ina contribuziun da maximalmain 200 000 francs ord la finanziaziun speziala Sport per renovar e per engrondir la chamona da Terri CAS. Ils custs totals dal project èn budgetads cun var 1,25 milliuns francs.

La secziun Piz Terri dal CAS posseda e tgira la chamona da Terri CAS. Quella è situada sin 2170 meters sur mar, al vest da Vrin. La chamona è il punct da partenza ideal per viandar sur il Plaun la Greina e porscha ina bellezza vista sin il Piz Terri. Cun la renovaziun duai vegnir meglierada cunzunt la substanza architectonica da la part veglia da la chamona e vegnir optimada l'infrastructura da la chamona.

© Arno Arpagaus, president da la secziun Piz Terri dal CAS

A partir dal 1. da december 2024 è Sabina Patt da Cazas la nova cumissaria chantunala d'avieuls. Ella è vegnida elegida da la Regenza per il rest da la perioda d'uffizi fin ils 30 da zercladur 2026. Plinavant engrazia la Regenza a l'actual cumissari chantunal d'avieuls Heinrich Heusser da Tavau Plaz per ils servetschs ch'el ha prestà. El ha demissiunà suenter avair lavurà durant 13 onns en questa funcziun.
La cumissaria d'avieuls è autorisada da coordinar e d'exequir mesiras per cumbatter las malsognas d'avieuls ch'èn suttamessas a l'obligaziun d'annunzia, quai en enclegientscha cun l'Uffizi per la segirezza da victualias e per la sanadad d'animals (USVA) e sa basond sin las directivas tecnicas professiunalas da l'Uffizi federal da segirezza alimentara e fatgs veterinars (USAV). Plinavant maina ella l'Inspecturat d'avieuls.

La Regenza ha approvà la prolungaziun dal contract da lavur dad Ines Follador, directura da la praschun Cazas Tignez. Ella resta en uffizi fin il mars 2026, quai è in onn sur la vegliadetgna da pensiun ora. Actualmain analisescha l'interpresa da cussegliaziun externa Social Design las structuras ed ils process entaifer l'Uffizi per l'execuziun giudiziala (UEG). Questa analisa sut il titel «AJV 2025+» vegn fatga per incumbensa dal UEG e dal Departament da giustia, segirezza e sanadad. Sin fundament da l'analisa e dal rapport dals resultats, ch'è da spetgar per il cumenzament dal 2025, pon vegnir realisadas eventualas adattaziuns organisatoricas e processualas sco er occupadas las posiziuns-clav senza squitsch da temp.