Cun il Bundstag dals 6 d'october 2024 en la Val Müstair ha lieu il settavel e l'ultim Bundstag da las festivitads da 500 onns. L'entira dumengia stat sut l'ensaina da l'engraziaivladad envers la natira e l'istorgia ed envida a giudair ed a far festa.
Gia avant ch'il Stadi liber da las Trais Lias è vegnì fundà, era la Val Müstair in lieu impurtant da transit e da commerzi. En la val hai però adina puspè er dà eveniments da guerra dramatics. Durant l'onn da giubileum sa regorda la vischnanca da Val Müstair da sia istorgia e da l'impurtanza da quella per il preschent e per il futur. Il Bundstag ha lieu il di da la festa tradiziunala da la racolta. La cumbinaziun da las duas festas pussibilitescha in access approfundà a l'istorgia, a la natira ed a la cultura che caracteriseschan oz la Val Müstair. Invistas en la discordia da la val dat in toc da teater che Eva e Magnus Schleich han creà aposta e che las gruppas da teater da la Val Müstair han inscenà per il giubileum.
Program multifar
Il di vegn avert cun in curt servetsch divin ecumenic, a las 10.45 a l'entrada ost dal vitg da Valchava sut tschiel avert. Gist suenter, a las 11.10, cumenza al medem lieu il grond cortegi tradiziunal da la festa da la racolta, quai cun la participaziun d'uniuns da costums, da societads da musica, da las scolaras e dals scolars da la scola Val Müstair sco er cun vaguns ed animals ornads da festa. L'act da festa cun pleds festivs dal cusseglier guvernativ Marcus Caduff, da la presidenta communala Gabriella Binkert e dal deputà Rico Lamprecht cumenza a las 14.00 sin l'areal da festa.
Teater «Spranza chi vegnan meglders temps», 15.00
Il teater davart il Stadi liber da las Trais Lias mussa la dramatica da quella giada. En l'introducziun dal toc da teater hai num: «Questa lia, ch'è vegnida concludida avant 500 onns, è unica, particularmain en vista a la periclitaziun actuala dals dretgs democratics. Ma betg tut è aur, quai che traglischa.» Las scenas istoricas en il teater alterneschan cun discussiuns tranter las acturas ed ils acturs. Cun explicaziuns maina il reschissur d'ina scena a l'autra. Adina cun la speranza sin megliers temps. Il toc da teater vegn medemamain preschentà mesemna, ils 2 d'october, sco er venderdi, ils 4 d'october, mintgamai a las 17.00.
Las festivitads han lieu a Valchava. Il vitg vegn decorà ritgamain. Passa 70 stans da vendita porschan spezialitads regiunalas, ina ustaria da festa envida da sa fermar. Il divertiment musical ed in program per uffants na dastgan sa chapescha betg mancar. La festa allegra daventa in plaschair per la populaziun e per ils giasts da dalunsch e damanaivel. In ultim Bundstag culminant da l'onn da giubileum. Il program detaglià è publitgà en l'agiunta sco er sin https://500.gr.ch/rum/event/bundstag-valmuestair/.
I vegn cusseglià da viagiar cun il traffic public. Grazia a la purschida «simpel per retour» pajais Vus mo il viadi per ir al Bundstag. Il viadi da return è gratuit fin a Voss lieu da partenza en il chantun Grischun.
Ulteriuras activitads da giubileum fin la fin da l'onn 2024
Fin la fin da l'onn 2024 han lieu bleras ulteriuras activitads da giubileum en tut las regiuns linguisticas. Ellas pon vegnir consultadas da tut temp sut https://500.gr.ch.
Fotografia agiuntada:
Festa da mastralia a Plaun Schumpeder, Sta. Maria, Val Müstair, enturn 1920 da Gian Battista Gross. Archiv dal stadi dal Grischun, N2.1420.
Agiunta:
Flyer da giubileum dal Bundstag Val Müstair (rumantsch/tudestg)
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch
Dumondas davart il Bundstag Val Müstair:
Responsabladad: Departament d'educaziun, cultura e protecziun da l'ambient