La Regenza ha concedì ina contribuziun chantunala cun in import maximal da 2,03 milliuns francs per proveder las regiuns Malögia e Bernina cun bindel ultralad (BUL). Cun la contribuziun chantunala duai vegnir pussibilità a las regiuns in provediment simmetric cun infrastructuras persistentas da BUL cun sveltezzas da passa 100 megabits per secunda. Uschia vegn stgaffida ina premissa impurtanta per laschar avanzar la transfurmaziun digitala en il chantun Grischun. Perquai che tant las interpresas sco er persunas privatas fan diever da novs servetschs digitals e d'applicaziuns che dovran bleras datas, è la dumonda per grondas capacitads da bindel ultralad s'augmentada cuntinuadamain ils ultims onns. Cun ils pli novs svilups tecnologics en ils secturs dal «Internet of Things» (colliaziun d'apparats fisics che pon barattar datas ed interagir sur l'internet), da l'intelligenza artifiziala u er cun la pussaivladad da far prognosas pli exactas da l'aura sco er d'eveniments extrems, pon ins partir dal fatg, che questa dumonda vegnia a s'augmentar vinavant er en l'avegnir. 

In'auta qualitad dal provediment è da gronda impurtanza per il chantun e per las regiuns. Ella gida ad augmentar l'attractivitad dal chantun per interpresas pitschnas e mesaunas sco er per las abitantas ed ils abitants. Perquai promova il Grischun l'extensiun dal bindel ultralad cun contribuziuns dal credit d'impegn per infrastructuras relevantas per il sistem.

A las uniuns Chur Unihockey e Piranha Chur ha la Regenza garantì ina contribuziun chantunala da maximalmain 135 000 francs per onn or da la finanziaziun speziala Sport per il project da pilot da 3 onns che prevesa da professiunalisar clubs gronds en il Grischun. La finamira dal project èsi da professiunalisar las structuras da las duas uniuns d'unihockey da la liga naziunal A en il rom da la fusiun planisada ad in'uniun. Concretamain duai quai vegnir realisà tranter auter cun la nominaziun d'ina u d'in mainagestiun sco er d'ina manadra u d'in manader Sport. La nova uniun gronda duai vegnir fundada l'atun 2024. La disposiziun da contribuziun a favur da quest project da pilot vegn relaschada cun la resalva, che tuttas duas uniuns existentas dettian lur consentiment a la fusiun.

En il Grischun ed er en tut la Svizra vegnan uniuns da sport grondas manadas per gronda part da suprastantas e suprastants en uffizi d'onur. Savens vegnan tals sustegnids d'in secretariat puramain administrativ, che vegn manà en uffizi accessoric. Ultra da las obligaziuns professiunalas e famigliaras chaschuna il grond engaschament en l'uniun dentant per regla ina surchargia pli u main ferma da las commembras e dals commembers da la suprastanza, quai senza ch'ellas ed els cuntanschian gronds progress en il svilup da l'uniun. Ina tala direcziun ineffizienta e la mancanza da resursas pericliteschan la funcziun da las uniuns grondas sco exempels, sco instituziuns da la coesiun sociala, sco lieus da scolaziun e sco centers da prestaziun. Ina direcziun operativa professiunala na concurrenzescha dentant betg cun l'uffizi d'onur, mabain rinforza quel. Cun il project da pilot duain vegnir rimnadas experientschas preziusas, schebain las investiziuns en ina direcziun pli effizienta sa laschan refinanziar cun retgavs pli gronds e schebain ina meglra direcziun da l'uniun sa paja per las commembras ed ils commembers sco er per las collavuraturas ed ils collavuraturs tant ord vista sportiva sco er organisatorica. Las enconuschientschas duain fullar via per optimar las structuras en autras uniuns da sport, per che las incumbensas en uffizi d'onur sajan puspè tematicamain attractivas e possian vegnir prestadas temporalmain. Tenor il project inoltrà èn ils custs totals per la fasa da pilot da 3 onns calculads cun 960 000 francs.

Chur Unihockey e Piranha Chur a chaschun dal di d'uniun cuminaivel 2023  /  © Chur Unihockey

La Regenza ha approvà in project per curreger la via d'Engiadina sin il traject tranter il portal da la gallaria Sassella e l'entrada dal vitg da Susch. En il rom dal project duai il traject da circa 1 kilometer lunghezza vegnir schlargià sin il profil traversal regular da 7 meters.

Il trassé vegn schlargià da la vart da la val. En quest connex vegnan las construcziuns da sustegn existentas demontadas e remplazzadas tras ina emplenida da terren planiva, che po vegnir cultivada da l'agricultura. Ils custs totals da quest project èn budgetads cun var 3,7 milliuns francs.

Arno Kirchen da Scuol è il nov president da la regiun d'urari 9 (Engiadina Bassa/Val Müstair). El è vegnì elegì da la Regenza per il rest da la perioda d'uffizi fin ils 30 da zercladur 2026. Plinavant engrazia la Regenza a l'anteriur president Rico Kienz da Ramosch per ils servetschs ch'el ha prestà. En vista a sia pensiun la fin d'avust 2024 ha el demissiunà sco mainagestiun da la regiun Engiadina Bassa/Val Müstair. Arno Kirchen ha surpiglià la gestiun da la regiun.

Tenor la Lescha davart il traffic public en il chantun Grischun elegia la Regenza la presidenta u il president d'urari da mintga regiun d'urari. Quellas e quels vegnan elegids mintgamai per ina perioda d'uffizi da 4 onns e represchentan las autoritads regiunalas en il rom da la procedura d'urari.