Sco contribuziun al giubileum «500 onns Stadi liber da las Trais Lias» ha l'Uffizi per la scola populara ed il sport elavurà in arranschament didactic per il nov med d'instrucziun «InVista Grischun». L'arranschament didactic cun il titel «Sin ils fastizs da las Trais Lias» promova la conscienza istorica da las scolaras e dals scolars ed è disponibel en furma digitala en tut las otg linguas da scola.
L'istorgia è preschenta dapertut ed il passà lascha enavos fastizs che tanschan fin en il temp preschent. Per il chantun Grischun è l'intermediaziun da sia istorgia e cultura fitg impurtanta. Avant ch'il Grischun è daventà ina part da la Republica helvetica, han las Trais Lias mess il fundament per il chantun actual cun sia geografia, cultura e diversitad linguistica.
En collavuraziun cun la chasa editura Schulverlag plus ha l'Uffizi per la scola populara ed il sport concepì ed elavurà in arranschament didactic digital davart il Stadi liber da las Trais Lias. Quel porscha unitads d'instrucziun divertentas ed instructivas a las persunas d'instrucziun sco er a las scolaras ed als scolars. Sin basa da las festivitads da 500 onns sa fatschentan las scolaras ed ils scolars en l'arranschament didactic cun l'istorgia dal chantun Grischun e suondan ils fastizs da las Trais Lias. En quest connex sa deditgeschan els a differentas dumondas davart la furmaziun ed il svilup dal chantun. Els elavuran tranter auter quai ch'è capità l'onn 1524, emprendan pertge ch'ins discurra d'in stadi liber e pertge che questa allianza è insumma vegnida realisada. Cun il raquint fictiv da Maurizio, Bertilla e Jovin tractan els dumondas istoricas davart ils origins dal chantun ed analiseschan differentas funtaunas.
Digital ed en otg linguas da scola
«InVista Grischun» è in med d'instrucziun digital per il rom «natira, uman e societad» (NUS) per il 2. ciclus ed integrescha ils desiderats spezials regiunals dal Plan d'instrucziun 21 Grischun. Tant il med d'instrucziun sco er l'arranschament didactic «Sin ils fastizs da las Trais Lias» vegnan publitgads en las otg linguas da scola tudestg, sursilvan, sutsilvan, surmiran, puter, vallader, rumantsch grischun e talian.
Ulteriuras activitads da giubileum ed ulteriurs projects
Las numerusas activitads en tut las regiuns linguisticas pon vegnir consultadas da tut temp en furma actuala sin https://500.gr.ch/rum/.
Fotografias agiuntadas:
Vista online arranschament didactic
Exempel d'illustraziun cuntegn didactic
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60 (cuntanschibel da las 10.00 fin las 12.00), e‑mail camenisch@vinavant.ch
Dumondas davart l'arranschament didactic:
- Josy Marie Künzler, manadra da project, Post spezialisà per meds d'instrucziun, Uffizi per la scola populara ed il sport, tel. +41 81 257 22 61 (cuntanschibla da las 10.00 fin las 12.00), e‑mail Josy.Kuenzler@avs.gr.ch
Responsabladad: Departament d'educaziun, cultura e protecziun da l'ambient