Dapi quest onn porschan las vischnancas da Domat, Landquart, Lumnezia, Puntraschigna, Poschiavo e Val Stussavgia per emprova e-voting. Suenter las emprimas trais votaziuns electronicas tira il chantun Grischun in facit positiv e prepara d'introducir e-voting en ulteriuras vischnancas grischunas.

Il november 2023 ha il Cussegl federal dà al chantun Grischun la permissiun da basa per far emprovas cun e-voting. Dapi la votaziun dals 3 da mars 2024 pon persunas cun dretg da votar dar giu lur vusch en furma electronica en las tschintg vischnancas da pilot grischunas Domat, Lumnezia, Puntraschigna, Poschiavo e Val Stussavgia. Cun la votaziun dals 9 da zercladur 2024 è Landquart vegnì vitiers sco sisavla vischnanca da pilot. En il fratemp è circa mintga dieschavla persuna che ha il dretg da votar en ina da questas vischnancas, s'annunziada per la votaziun electronica. A chaschun da l'ultima votaziun dals 22 da settember 2024 eran quai 1801 persunas da totalmain 17 747 persunas cun dretg da votar.

Il chantun Grischun è cuntent cun il diever dad e-voting d'enfin ussa. Las persunas ch'èn s'annunziadas per e-voting, han duvrà frequentamain il nov chanal da votaziun e chapì il process da votar. La segirezza è stada garantida da tut temp.

Almain 12 ulteriuras vischnancas cumenzan l'onn 2025 cun e-voting
Suenter che la pratica dad e-voting ha cumenzà cun success, pon ins cuntinuar sco planisà en las sis vischnancas da pilot actualas. Ultra da quai ha la Chanzlia chantunala cumenzà gia suenter il success da l'emprima dumengia da votaziun dals 3 da mars 2024 cun las lavurs per extender e-voting pass per pass sin ulteriuras vischnancas interessadas. L'urari per introducir il chanal da votaziun electronic dependa en quest connex fermamain da las cundiziuns generalas tecnicas sco er organisatorics en las vischnancas.

A partir da la votaziun federala dal pievel dals 18 da matg 2025 survegnan er las persunas cun dretg da votar da las set vischnancas dad Arosa, Panaduz, Tavau, Tumleastga, Malans, Maiavilla e Silvaplauna la pussaivladad da votar sin via electronica. Anc en il decurs dal 2025 è planisada l'introducziun dad e-voting er en las vischnancas da Grüsch, Jenins, Valragn, Scharàns e Tumein. Pervia da las premissas tecnicas n'han ins anc betg fixà l'emprim termin da votaziun pussaivel per questas tschintg vischnancas. Pass per pass duain uschia tut las vischnancas interessadas pudair participar al manaschi d'emprova. Cun sis autras vischnancas interessadas è il chantun Grischun gia en contact.

Las persunas cun dretg da votar pon s'annunziar da tut temp
En las vischnancas da pilot ston las persunas cun dretg da votar che sa decidan per e-voting, s'annunziar ina giada tar lur vischnanca, e quai il pli tard 8 emnas avant lur emprima votaziun electronica. Per la proxima votaziun dal pievel dals 24 da november 2024 è la fanestra d'annunzia per e-voting perquai gia serrada dapi ils 29 da settember 2024. Per la votaziun dals 9 da favrer 2025 serra la fanestra d'annunzia per e-voting ils 15 da december 2024. Da s'annunziar per e-voting è però pussaivel da tut temp. Las votantas ed ils votants da las novas vischnancas da pilot, che dastgan votar per l'emprima giada ils 18 da matg 2025 cun in clic sin la mieur, pon previsiblamain s'annunziar a partir dal cumenzament da l'onn 2025.

Qua vai tar l'annunzia per e-voting en il chantun Grischun: https://www.gr.ch/e-voting/anmelden

Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch.

Fotografia agiuntada:

Infurmaziuns:

Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.00 fin las 12.00), e‑mail Daniel.Spadin@staka.gr.ch