Sin invitaziun da la Regenza grischuna ha la Regenza da la provinza autonoma Bulsaun – Tirol dal Sid visità oz il chantun Grischun. En il rom d'in discurs constructiv en la Chasa grischa a Cuira èn vegnids tractads differents temas transcunfinals.

Suenter il bainvegni uffizial davant la Chasa grischa – ornada cun bandieras – ha cumenzà il discurs da lavur en la sala da la Regenza. La delegaziun da la Regenza da la provinza autonoma Bulsaun – Tirol dal Sid è vegnida manada dal guvernatur Arno Kompatscher e la Regenza dal chantun Grischun dal president da la Regenza Jon Domenic Parolini.

Temas multifars
En il discurs da lavur è vegnida tematisada tranter auter la colliaziun da viafier tranter l'Engiadina ed il Vnuost. Ultra da quai è la scuntrada stada ina buna occasiun per discutar ensemen davart l'engaschament da voluntarias e voluntaris per acziuns da la protecziun civila en ils territoris vischins cunfinants respectivs, davart l'evaluaziun da strategias localas en il sectur da la segirezza publica e davart il tema animals da rapina gronds. Plinavant han ils temas politica da famiglia, midadas demograficas e lavur voluntara procurà per in barat constructiv. A la fin dal discurs da lavur èsi vegnì rapportà davart ils projects da perscrutaziun cuminaivels actuals e discutà davart projects futurs pussaivels.

Relaziuns istoricas Tirol dal sid-Grischun
Suenter il discurs da lavur èn stads sin il program in gentar cuminaivel ed ina visita da l'Archiv dal stadi dal Grischun. En il center da la visita guidada è stà in sguard sin las relaziuns istoricas tranter la provinza autonoma Tirol dal Sid ed il chantun Grischun. Er las scuntradas da las regenzas dal Tirol dal sid e dal chantun Grischun èn daventadas ina tradiziun. Dapi l'onn 1999 sa scuntran las regenzas regularmain per discurs da lavur.

Fotografias agiuntadas:

Foto 2

Infurmaziuns:

President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 16.30 fin las 17.00), e‑mail Jondomenic.Parolini@ekud.gr.ch