La Regenza ha approvà in contract da cumpra per acquistar ina surfatscha parziala da la Fundaziun Seminari da spirituals Son Gliezi a Cuira, cun l'intent da realisar il Center da scola auta spezialisada dal Grischun. Ultra da quai ha ella approvà la conclusiun dal contract da dretg da construcziun tranter la citad da Cuira ed il chantun Grischun.
Approvà ulteriurs pass per realisar il Center da scola auta spezialisada dal Grischun
La Regenza ha approvà l'acquist d'ina surfatscha parziala da 1594 meters quadrat
che appartegna a la Fundaziun Seminari da spirituals Son Gliezi e ch'è situada
en il territori da la Pulvermühlestrasse a Cuira. Ultra da quai ha ella approvà
la conclusiun dal contract da dretg da construcziun tranter la citad da Cuira
ed il chantun Grischun sin donn e cust da duas parcellas en la dimensiun da
totalmain 13 313 meters quadrat en il medem territori.
La Scola
auta spezialisada dal Grischun (SASGR) ha ina fitg gronda impurtanza per il
chantun ed ademplescha las pretensiuns da scolaziun da studentas e students
indigens ed extrachantunals sco er da l'economia e da la scienza. Durant ils
ultims onns è la SASGR sa sviluppada fermamain ed ha adina puspè stuì prender en
locaziun novas localitads. Las studentas ed ils students
èn repartids oz sin tschintg lieus, quai che impedescha da manar la scola auta
en moda effizienta. Cun realisar in
nov Center da scola auta spezialisada vegnan eliminadas las flaivlezzas da
l'infrastructura existenta. Medemamain resultan perspectivas progressivas che
favuriseschan innovaziuns e che permettan ina meglra colliaziun entaifer la
scola auta (cf.communicaziun a las medias dals 10-08-2022).
Il
Cussegl grond ha acceptà cun gronda maioritad la realisaziun d'in Center da
scola auta spezialisada respectivamain las propostas da la missiva en la sessiun d'october 2022. Ils 12 da mars 2023 ha il
pievel grischun approvà cun passa 83 pertschient da las vuschs tant il credit
d'impegn da netto 151 milliuns francs per construir il Center da scola auta spezialisada sco er la surdada gratuita dals edifizis
a la SASGR sco proprietad cundiziunada, suenter che las lavurs da construcziun
èn terminadas. Las parcellas pertutgadas vegnan messas a disposiziun a la SASGR
en il rom da dretgs respectivamain da sutdretgs da construcziun. Il zercladur
2024 ha la citad da Cuira dà la permissiun da construcziun a l'Uffizi da
construcziun auta (cf.communicaziun a las medias dals 17-06-2024). L'emprima badigliada per il nov edifizi
è previsa la fin da november 2024. Il nov Center da scola auta spezialisada duai
vegnir retratg l'onn 2028.
La Regenza ha approvà l'acquist d'ina surfatscha parziala da 1594 meters quadrat che appartegna a la Fundaziun Seminari da spirituals Son Gliezi e ch'è situada en il territori da la Pulvermühlestrasse a Cuira. Ultra da quai ha ella approvà la conclusiun dal contract da dretg da construcziun tranter la citad da Cuira ed il chantun Grischun sin donn e cust da duas parcellas en la dimensiun da totalmain 13 313 meters quadrat en il medem territori.
