Las chatschadras grischunas ed ils chatschaders grischuns han prestà buna lavur durant la chatscha auta dal settember 2024. Ellas ed els han sajettà dapli tschiervs che l'onn avant, il dumber da chavriels e da chamutschs sajettads è in pau pli bass che quel da l'onn 2023. Per ademplir ils plans da prelevaziun ch'èn fixads sin in aut nivel en l'entir chantun, vegn la chatscha speziala organisada il november ed il december en tut las regiuns.
En blers lieus ha il cumenzament da l'enviern mez settember procurà per bunas cundiziuns da chatscha durant la segunda mesadad da la chatscha auta grischuna. Uschia han las chatschadras ed ils chatschaders pudì sajettar 3562 tschiervs e 2472 chavriels, quai malgrà il fitg nausch cumenzament da la chatscha. En cumparegliaziun cun ils ultims 20 onns è quest resultat levamain pli aut. Tar ils chamutschs è il resultat final da la chatscha auta 2024 – cun 2905 animals sajettads – levamain pli bass ch'ils onns precedents. En la Mesolcina èn plinavant vegnids sajettads 34 portgs selvadis.
Resultats da l'emprima part da la chatscha grischuna 2024:
Impurtanta chatscha speziala
La chatscha speziala, che dura dals 2 da november fin ils 18 da december 2024, è impurtanta per ademplir ils plans da prelevaziun tar ils animals feminins e per adattar il dumber da tschiervs e da chavriels als quartiers d'enviern. Quai è er impurtant per mantegnair a lunga vista guauds da protecziun sauns e bain structurads. Per ademplir ils plans da prelevaziun e l'incumbensa da chatscha vegnan dads libers en tut il chantun 1955 vatgas-tschierv e lur vadels sco er 148 chavriels per la chatscha speziala da quest onn. Ultra da quai ston vegnir sajettads 16 chamutschs en trais territoris problematics guaud-selvaschina – Schwarzwald Cuira, en il territori da Trimmis dal Haagtobel fin Maschänser Rüfi e Prau Pign. Tar ils tschiervs e tar ils chavriels è il plan da la chatscha speziala 2024 pli bass che quel dals onns precedents. En la Mesolcina vegnan ils portgs selvadis dads libers – sco ils onns precedents – illimitadamain per la chatscha speziala, perquai che las populaziuns creschan e perquai ch'els fan pli e pli gronds donns en l'agricultura.
Ina lavur pretensiusa spetga
La regulaziun da vatgas-tschierv e da chauras-chavriel il november ed il december è ina incumbensa permanenta fitg pretensiusa. Particularmain tar ils tschiervs ston las chatschadras ed ils chatschaders far gronds sforzs en bleras regiuns per cuntinuar cun la reducziun da la populaziun, ch'è vegnida definida en il rom da la strategia da la Regenza «Spazi da viver guaud-selvaschina 2021». En differents territoris han ins pudì reducir las populaziuns. Per las chatschadras ed ils chatschaders na daventa l'incumbensa uschia betg pli simpla. «Igl è impurtant che la lavur da las chatschadras e dals chatschaders vegnia sustegnida er en cas da cundiziuns difficilas per tut las persunas participadas, en spezial er per las proprietarias ed ils proprietaris da guaud», di Lukas Walser, manader da la partiziun Selvaschina e chatscha tar l'Uffizi da chatscha e pestga.
Agiuntas:
Infurmaziuns:
- Lukas Walser, manader da la partiziun Selvaschina e chatscha, Uffizi da chatscha e pestga, tel. +41 81 257 38 92 (cuntanschibel da las 10.00 fin las 11.30), e‑mail Lukas.Walser@ajf.gr.ch
- Urban Maissen, selvicultur chantunal, Uffizi da guaud e privels da la natira, tel. +41 79 475 52 11 (cuntanschibel da las 11.00 fin las 12.00), e‑mail Urban.Maissen@awn.gr.ch
Responsabladad: Uffizi da chatscha e pestga