Mesemna saira, ils 23 d'october 2024, ha l'Uffizi da construcziun bassa organisà en collavuraziun cun l'Uffizi da guaud e privels da la natira in'occurrenza d'infurmaziun publica a Castaneda. La populaziun da la Val Calanca è vegnida infurmada davart las siglientadas ch'ins ha realisà dacurt cun success en il sectur Revetell e davart il project da spustar la via chantunala tranter Molina e Buseno, inclusiv la construcziun dal rempar da protecziun.

Durant las ultimas emnas ed ils ultims mais è capità bler per lung da la via da Calanca: L'Uffizi da construcziun bassa (UCB) ha realisà en collavuraziun cun l'Uffizi da guaud e privels da la natira (UGP) differentas mesiras per augmentar la segirezza da la via da Calanca. Per infurmar activamain la populaziun al lieu davart las activitads, ha il UCB envidà la mesemna saira ad in'occurrenza d'infurmaziun publica en la halla da gimnastica da la vischnanca da Castaneda. La populaziun ha mussà grond interess per l'occurrenza.

Siglientadas e spustament da la via chantunala en il focus
En il sectur Revetell han ins realisà gia avant var 10 dis, ils 15 d'october 2024, siglientadas impurtantas vid la paraid da grip. Grazia a la buna planisaziun ed al grond engaschament da bleras persunas participadas, è la siglientada da var 310 meters cubics grip vegnida terminada cun success. Uschia è la segirezza da la via da Calanca vegnida augmentada considerablamain. Questas lavurs cumplexas e pretensiusas pertutgant la segirezza èn stadas ina gronda sfida per tut las persunas participadas.

In ulteriur focus da la saira d'infurmaziun è stà il project da spustar la via chantunala tranter Molina e Buseno e da construir in rempar da protecziun en quest perimeter. Il rempar da protecziun da var 240 meters lunghezza e fin 10 meters autezza duai franar blocs crudants en il cas da crudadas da crappa. Per ch'il rempar haja l'effect da protecziun optimal sto el – tenor retschertgas – vegnir construì sin la via chantunala actuala. Per consequenza ha il UCB elavurà in nov trassé per la via chantunala. Cun la finamira da pudair exponer publicamain il project fin la fin da l'onn, lavura il UCB intensivamain vid la projectaziun da questas lavurs.

Fotografias agiuntadas:

Agiunta 1: Marcar las foras da sondagi sco preparaziun per las lavurs da siglientar.

Agiunta 2: Preschentaziun dal nov trassé da la via chantunala inclusiv il rempar da protecziun.

Ulteriuras fotografias e un film (Lavurs da siglientar en il sectur Revetell da mardi, ils 15 d'october 2024) stattan a disposiziun per chargiar giu sut il suandant link.

Infurmaziuns:

Sven Fehler, manader Projectaziun/construcziun dal district 2 Mesauc, Uffizi da construcziun bassa, tel. +41 91 822 81 20 (cuntanschibel da las 10.00 fin las 12.00), e‑mail Sven.Fehler@tba.gr.ch

Responsabladad: Uffizi da construcziun bassa

Rait da protecziun la pli ferma da l'entir mund per la val Calanca

Ultra dal rempar da protecziun vegn er installada ina rait cunter crudadas da crappa tranter Molina e Buseno. Areguard la capacitad d'absorbar energia sa tracti da la gruppa da rait la pli ferma ch'è actualmain sin il martgà. Ella retegna blocs da grip cun in'energia chinetica da fin 10 000 kilojoule. Quai è cumparegliabel cun l'energia d'in auto da 2 tonnas che collidescha tar ina sveltezza da 360 km/h nunfranà cun in obstachel. Sin l'entir mund èn vegnidas montadas pir 4 da questas raits.