Il Departament da giustia, segirezza e sanadad ha laschà analisar l'economia da manaschi da tschintg dals indesch ospitals acuts grischuns subvenziunads dal maun public. Questa analisa furnescha als ospitals ed a las vischnancas basas da decisiun per adattar l'economia da manaschi e per definir l'orientaziun futura da lur purschida da prestaziuns.
En il chantun Grischun èn las vischnancas attribuidas ad ina da las 12 regiuns da provediment da la sanadad. Las regiuns da provediment da la sanadad han l'incumbensa da proveder la populaziun cun furniturs da prestaziuns sco ospitals, chasas da persunas attempadas e da tgira, Spitex u servetschs da salvament. L'incumbensa dal chantun è percunter tenor lescha quella, da planisar il provediment staziunar per la populaziun e da conceder contribuziuns per in tractament medicinal, ina tgira sco er in'assistenza medicinala ambulanta e staziunara, e quai confurm al basegn, en moda adequata ed economica ed en la qualitad necessaria. En connex cun la planisaziun d'ospitals sto il chantun resguardar, che tut la populaziun dal chantun haja entaifer in temp adequat access a las prestaziuns d'ospital necessarias.
A partir da l'onn 2026 sto il chantun far ina nova planisaziun da las staziuns acutas dals ospitals. Perquai ha il Departament da giustia, segirezza e sanadad (DGSS) incumbensà l'interpresa da revisiun KPMG da preparar ordavant ils fatgs per mauns da la politica.
Emprimas basas da decisiun per la planisaziun dals ospitals 2026
Las structuras da las regiuns da provediment da la sanadad existan gia u vegnan actualmain implementadas. En vista a la situaziun dal provediment resultan però differentas difficultads: Ils ospitals en il chantun Grischun han pli e pli fadia da procurar per lur finanziaziun cun la purschida da prestaziuns actuala. Da l'autra vart vegn lur manaschi confruntà cun sfidas, per exempel pervia da la mancanza da persunas spezialisadas. En la situaziun actuala è plinavant periclità il provediment (en cas d'urgenza) tras medias e medis da chasa en las regiuns.
Calculaziuns sin basa d'in scenari cun ina reducziun da las prestaziuns
L'analisa ha prendì sut la marella, tge consequenzas che las purschidas staziunaras ed ambulantas han per il quint economic dals ospitals. La KPMG è partida dal scenari, ch'ils tschintg ospitals regiunals analisads concentrassan lur prestaziuns sin la medischina interna sco er sin prestaziuns da sanadad chirurgicas ambulantas (clinica dal di). Intervenziuns chirurgicas che pretendan in'ospitalisaziun staziunara, na vegnissan betg pli purschidas. Correspundentamain vegnissan en quest scenari la chirurgia staziunara e l'assistenza da parturir stritgadas or da la purschida da prestaziuns dals tschintg ospitals regiunals examinads.
Il connex per quest scenari: Sch'ils ospitals ston tegnair a disposiziun salas d'operaziun ed il persunal respectiv per in manaschi da 24 uras, resultan tras quai auts custs da manaschi. Per l'assistenza da parturir ston per exempel ultra da la spendrera er star a disposiziun in team da chirurgia e d'anestesia. Sche talas prestaziuns da basa fixas na ston betg vegnir furnidas, èsi pussaivel da reducir ils custs.
La reducziun da la purschida ha differents effects sin ils ospitals
L'analisa mussa il suandant: Sch'il spectrum da prestaziuns vegn reducì en tut ils tschintg ospitals, procura quai per grondas differenzas en ils resultats da gestiun. Sch'ins laschass davent las prestaziuns da la chirurgia staziunara e da l'assistenza da parturir, avess quai bain in effect positiv sin ils custs, a medem temp però er in effect negativ sin las entradas. Per dus ospitals avess la reducziun da la purschida tut en tut in effect positiv sin la situaziun finanziala. Tar dus ospitals resultass in effect negativ. In ospital na badass strusch in effect.
En il spectrum da las prestaziuns na vesa la KPMG correspundentamain betg il motiv principal per ils quints deficitars. Per meglierar il resultat ston plitost vegnir examinads potenzials d'optimaziun alternativs. L'interpresa da revisiun cusseglia perquai als ospitals pertutgads d'examinar detagliadamain lur structuras economicas e d'adattar alura lur purschida da prestaziuns al conturn ed al martgà respectiv.
Las regiuns da provediment da la sanadad vegnan confruntadas cun differentas sfidas
Il DGSS prenda enconuschientscha dals resultats da l'analisa da la KPMG. «L'analisa mussa cleramain, quant differentas che las sfidas per ils purtaders dals ospitals en las singulas regiuns da provediment da la sanadad èn», di il cusseglier guvernativ Peter Peyer, schef dal Departament da giustia, segirezza e sanadad. Il chantun sa stenta da sustegnair las vischnancas durant la realisaziun da las regiuns da provediment da la sanadad en tala maniera, che la populaziun ha la finala a disposiziun in provediment da sanadad ed en cas d'urgenza or d'in maun, sco previs en la Lescha per promover la tgira da persunas malsaunas.
Ils resultats da l'analisa da la KPMG ha il chantun mess a disposiziun als ospitals. Sche e tge adattaziuns structuralas ed economicas ch'ils ospitals duain realisar e sch'els adatteschan lur purschida da prestaziuns, ston ils purtaders dals singuls ospitals decider, quai vul dir las vischnancas da las regiuns da provediment da la sanadad respectivas.
Agiuntas:
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad. Las dumondas vegnan coordinadas da Ursina Trautmann, responsabla per la communicaziun dal Departament da giustia, segirezza e sanadad, tel. +41 79 712 51 57, e‑mail Medienstelle@djsg.gr.ch.
Responsabladad: Departament da giustia, segirezza e sanadad