L'exposiziun ambulanta per il giubileum da «500 onns Stadi liber da las Trais Lias» terminescha cun success sia turnea tras il Grischun e resplenda ensemen cun ils stgazis rimnads en in'exposiziun speziala dal Museum retic. Plain mirveglias dastgan ins spetgar ina parada d'objects emprestads ch'è tutganta, interessanta e cun bleras fassettas.
Dal matg fin l'october ha il museum mobil cotschen viv fatg ina tura sco chombra da stgazis rullanta tras il Grischun ed ha preschentà fatgs captivants ed infurmativs davart l'istorgia e la cultura dal chantun e da sias abitantas e ses abitants. En mintga fermada da la turnea èn las visitadras ed ils visitaders vegnids envidads da purtar speravia il di da rimnada lur stgazis persunals sco emprest e d'als trametter sin viadi. En ina curuna da figurinas engrondida èn vegnids exponids ils objects rimnads e lur istorgias che han mussà exemplaricamain, tge che las Grischunas ed ils Grischuns collian cun esser da chasa, cun il Grischun e cun la patria.
«Stgazis grischuns» splenduran en il Museum retic
Circa 160 objects emprestads da Grischunas e Grischuns èn stads da viadi cun il museum mobil. Guaffens antics, gravuras veglias, lavurs a maun ubain objects chattads raquintan istorgias da famiglias e da vitgs, mussan access privats u rapportan d'eveniments. I n'èn betg simplamain vegnids confidads objects, mabain er las istorgias fitg persunalas ch'èn colliadas cun tals.
Per il giubileum da 500 onns dat l'exposiziun speziala «allià e collià – 500 onns Stadi liber da las Trais Lias» dal Museum retic in sguard enavos sin il temp dal Stadi liber da las Trais Lias e mussa, tge effects che quest temp ha sin il Grischun d'ozendi. L'exposiziun dura dals 9 da november 2024 fin ils 30 da mars 2025. Tut ils objects emprestads da la populaziun, ch'èn vegnids rimnads en il rom da l'exposiziun ambulanta, èn integrads en l'exposiziun, quai sper auters objects e documents istorics. L'exposiziun speziala vegn averta cun ina vernissascha publica venderdi, ils 8 da november 2024, a las 18.00.
In minimuseum curunà da success
Il minimuseum mobil ch'è equipà cun in facsimile da la Brev da federaziun dals 23 da settember 1524, material da chartas ed ina cronologia da l'istorgia dal Stadi da las trais lias, ina curuna da figurinas engrondida cun emprests e la gallaria da maletgs preschentada vi da las paraids exteriuras dal container cun objects istorics or dals archivs e museums grischuns, ha fascinà tant ils giasts sco er las persunas indigenas durant sia turnea en 12 staziuns. Durant ses viadi tras il Grischun è l'exposiziun ambulanta vegnida accumpagnada d'in program varià. En il rom da l'exposiziun «allià e collià» è il container ussa staziunà davant il Museum retic e po vegnir visità durant las uras d'avertura dal museum anc fin la fin da mars 2025. Cura che l'exposiziun è terminada, pia a partir da la fin da mars 2025, èsi pussaivel da cumprar il container. Persunas interessadas pon s'annunziar fin il 1. da december 2024 cun propostas concretas ad info@500.gr.ch.
Ulteriuras activitads da giubileum fin la fin da l'onn 2024
Fin la fin da l'onn 2024 han lieu bleras ulteriuras activitads da giubileum en tut las regiuns linguisticas. Ellas pon vegnir consultadas da tut temp sut https://500.gr.ch.
Fotografia agiuntada:
Il president da la Regenza dr. Jon Domenic Parolini surdat – en preschientscha dal manader dal project parzial Christoph Luzi e dal manader dal project general Daniel Camenisch – a Zoë Schurter ed a Roland Signer dal Museum retic la clav als stgazis grischuns.
Agiunta:
Fegl d'infurmaziun davart l'exposiziun speziala «allià e collià»
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch
Dumondas en connex cun l'exposiziun ambulanta:
- Dr. Christoph Luzi, manader dal project parzial Exposiziun ambulanta, tel. +41 78 930 36 21, e‑mail luzi@clu-cultur.ch
Dumondas en connex cun l'exposiziun ambulanta:
Responsabladad: Departament d'educaziun, cultura e protecziun da l'ambient