La Regenza ha approvà il project d'exposiziun per la correcziun e per la sanaziun da la via dal Güglia cunter canera, quai sin il traject tranter il Rosenhügel ed il Hohenbühlweg a Cuira. Tut en tut custa il project circa 6,02 milliuns francs.

Il traject da via è per part en in nausch stadi architectonic. Cun la correcziun planisada duai il profil normal vegnir adattà a las normas e la surstructura sco er il sistem d'allontanament da l'aua duain vegnir renovads. Per quest intent duai la via vegnir schlargiada da la vart da la val cun construcziuns che guardan sur la spunda ora e cun mirs da sustegn. Da la vart da la muntogna vegn la via schlargiada cun allontanar ina part da la spunda e cun construir mirs. Sco protecziun cunter canera e per motivs da manaschi (distanzas da vista tar ils passadis per pedunas e peduns e tar las fermadas da bus sin la via) duai la sveltezza maximala signalisada vegnir reducida sin l'entir perimeter dal project dad oz 50 km/h a 30 km/h (zona 30).

Sin proposta da la citad da Cuira prevesa la correcziun da la via plinavant ina nova fermada da bus «St. Antönienrank» tenor ils basegns da las persunas cun impediments (fermada sin la via) en tuttas duas direcziuns. In nov surpassadi cun ina insla da segirezza per pedunas e peduns amez la via duai impedir ch'ils bus che ferman vegnian surpassads. Er duai el garantir la segirezza da las pedunas e dals peduns che traversan la via. Sin quest traject dal project èsi plinavant previs da construir in nov passape da la vart interna da la storta.

 

La CEL Buseno SA vul trair a niz la Calancasca per producir electricitad. Per l'ovra electrica da flum planisada vegni fatg quint cun custs d'investiziun da var 13,5 milliuns francs e cun ina producziun dad en media 7,3 fin 9 milliuns kWh per onn.

La radunanza communala da Buseno ha dà ils 12 da december 2007 la concessiun a la CEL Buseno SA per trair a niz la Calancasca, circa davent da la cota da 758 m s.m. fin circa a la cota da 692 m s.m., cun ina quantitad da 4500 liters aua utilisabla per secunda. Cun il conclus dals 6 da settember 2016 ha la Regenza approvà la concessiun ed il project per il «Impianto di Buseno». Cunter quest conclus èsi vegnì fatg recurs fin davant il Tribunal federal. Cun sia sentenzia dals 31 da schaner 2019 aveva il Tribunal federal approvà per part il recurs. La dumonda d'approvaziun da la concessiun e dal project è alura vegnida returnada a la Regenza per sclerir quels fatgs che n'eran anc betg vegnids sclerids suffizientamain tenor il Tribunal federal.

Ils 2 da fanadur 2019 ha la CEL Buseno SA inoltrà il dossier «Revisione dei piani e analisi tecniche richieste dal Tribunale federale con sentenza 31 gennaio 2019» cun differentas cumplettaziuns e supplitgà da nov la Regenza d'approvar la concessiun ed il project «Impianto di Buseno». Ussa ha la Regenza concedì l'approvaziun.

La Regenza ha approvà la nova incarica da prestaziun cun l'uniun Clom d'urgenza per geniturs per ils onns 2025 fin 2028. In'emprima incarica da prestaziun (2014–2016) cun l'uniun Clom d'urgenza per geniturs aveva la Regenza approvà l'onn 2014. Silsuenter è quella vegnida renovada pliras giadas. La purschida è s'etablida en il chantun Grischun. Durant l'emprima mesadad da l'onn 2024 è la dumonda puspè s'augmentada considerablamain en cumparegliaziun cun ils dus onns avant. Per la perioda da prestaziun 2025 fin 2028 ha la Regenza concedì ina contribuziun chantunala da 30 000 francs per onn.

L'uniun Clom d'urgenza per geniturs exista dapi l'onn 1983 ed è in post da consultaziun per geniturs u per persunas da referiment d'uffants e da giuvenils da tut las vegliadetgnas. En situaziuns da surpretensiun en l'educaziun sco er en cas da conflicts, da crisas u da violenza porscha il Clom d'urgenza per geniturs di e notg 365 dis cussegliaziun al telefon, cussegliaziun persunala e cussegliaziun electronica (e-mail). Cunquai che la purschida dal Clom d'urgenza per geniturs è adina cuntanschibla ed ha in'auta qualitad, distgargia e deescalescha ella situaziuns da crisa. Plinavant ha ella in effect preventiv per impedir che uffants vegnan maltractads u negligids.

La Regenza grischuna engrazia a la Regenza dal chantun Turitg per il grond sustegn finanzial, che vegn danovamain prestà or dal Fond d'utilitad publica a favur da tschintg projects en il chantun Grischun. Las contribuziuns a quests projects d'infrastructura en differentas regiuns ed en divers territoris linguistics èn da gronda impurtanza per la realisaziun dals projects respectivs. 

Quests uschenumnads «Projects d'agid naziunals 2024» dal chantun Turitg resguardan ils suandants projects en il chantun Grischun: l'avertura dal guaud Jenisberg en la vischnanca da Bravuogn Filisur (250 000 francs), la reconstrucziun da la via forestala Roré-Laura cun la construcziun d'in batschigl d'aua da stizzar fieu en la vischnanca da Roveredo (100 000 francs), la renovaziun da la Strada di Maria Teresa en la vischnanca da Roveredo (110 000 francs), la sanaziun da la Calörtscherstrasse en la vischnanca da Val Stussavgia (100 000 francs) sco er la sanaziun dal mulin vegl a Ftan en la vischnanca da Scuol (165 000 francs).