Suenter in temp da construcziun da trais onns ha la cussegliera guvernativa Carmelia Maissen surdà oz uffizialmain il tunnel Val Alpetta al traffic. Il tunnel è vegnì construì en il rom da la sanaziun da la via da Samignun ed è il segund da tut en tut quatter projects da tunnels. Ils dus ultims tunnels Val Cotschna e Val Mundin vegnan realisads ils proxims onns.

In ulteriur term impurtant da la sanaziun da la via da Samignun è cuntanschì: Dus onns suenter la perfuraziun il november 2022 han la cussegliera guvernativa Carmelia Maissen, scheffa dal Departament d'infrastructura, energia e mobilitad, e l'inschigner chantunal Reto Knuchel avert oz suentermezdi festivamain il tunnel Val Alpetta. «Il nov tunnel è dapli che mo in'ovra da construcziun. El è in simbol per nossa resolutezza da sustegnair e da promover la regiun da Samignun er en temps pretensius», ha ditg la cussegliera guvernativa Carmelia Maissen. Prendì part da l'occurrenza festiva han er il president communal da Samignun, Daniel Högger, ed il vicepresident communal da Valsot, Fadri Riatsch, sco er differents giasts envidads. Il tunnel Val Alpetta è il segund da totalmain quatter projects da tunnels che vegnan realisads durant la correcziun da la via da Samignun. Gia l'onn 2017 ha il tunnel Val Pischöt pudì vegnir surdà al traffic. Ils dus ultims tunnels Val Cotschna e Val Mundin vegnan realisads ils proxims onns.

Il tunnel Val Alpetta ha ina lunghezza da 632 meters e custa var 16,6 milliuns francs. Grazia al vial da 7 meters ladezza ed al profil interiur da 4,5 meters autezza po il traffic charrar ussa sin dus vials. Uschia vegn optimada decisivamain la circulaziun dal traffic, particularmain er per vehichels dal traffic public e per il transport da furniziuns per la vischnanca da Samignun. E la segirezza vegn augmentada considerablamain per tut las utilisadras e tut ils utilisaders da la via. L'entir project da sanaziun ha ina lunghezza totala da 970 meters e custa 28,6 milliuns francs. Ultra dal tunnel cumpiglia il project numnadamain er plirs mirs da sustegn, la construcziun dal portal ost e vest sut tschiel avert sco er lavurs vi dal trassé.

Il tunnel po vegnir avert pli baud che planisà
Las lavurs en il tunnel Val Alpetta vegnan ad esser terminadas uffizialmain l'onn proxim. Durant la stad 2025 suondan la cuvrida finala e las marcaziuns definitivas. Suenter che questas lavurs èn terminadas, vegnan demontadas las installaziuns temporaras cunter crudadas da crappa. Plinavant vegnan ils indrizs da cabels existents transferids en ils novs blocs da cabels, ed i vegn cumenzà cun l'allontanament e cun la renatiralisaziun dal traject actual.

Ulteriuras lavurs a partir dal 2025
Las lavurs en il tunnel Val Alpetta vegnan ad esser terminadas uffizialmain l'onn proxim. Durant la stad 2025 suondan la cuvrida finala e las marcaziuns definitivas. Suenter che questas lavurs èn terminadas, vegnan demontadas las installaziuns temporaras cunter crudadas da crappa. Plinavant vegnan ils indrizs da cabels existents transferids en ils novs blocs da cabels, ed i vegn cumenzà cun l'allontanament e cun la renatiralisaziun dal traject actual.

Las preparaziuns per la terza da las quatter etappas planisadas, il tunnel Val Cotschna, èn gia en planisaziun. La Regenza ha approvà il project il november 2023. L'Uffizi da construcziun bassa vul cumenzar cun las lavurs da construcziun sco talas l'onn 2026 e prevesa da far las emprimas lavurs preparatoricas gia la fin da la stad 2025.

Agiunta:

Fegl d'infurmaziun da l'Uffizi da construcziun bassa

Fotografias agiuntadas:

Il portal vest cun il nov mir da sustegn

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01 (cuntanschibel da las 15.30 fin las 16.30), e‑mail Reto.Knuchel@tba.gr.ch