A Tavau surpassa la canera da la via en divers lieus las limitas admessas. Perquai ha l'Uffizi da construcziun bassa elavurà – en collavuraziun cun la vischnanca da Tavau – in project da sanaziun cunter canera per reducir la grevezza da canera. En il rom da la procedura d'exposiziun pon las persunas interessadas s'exprimer davart il project fin ils 11 da december 2024.

Avant bunamain 30 onns èn vegnidas messas en vigur sin plaun federal la Lescha davart la protecziun da l'ambient e sin basa da quella l'Ordinaziun davart la protecziun cunter canera. En quests dus decrets vegnan fixadas limitas per la canera da la via, ch'è admessa. Francada è medemamain in'obligaziun da sanaziun, sche las limitas vegnan surpassadas permanentamain. A Tavau vegnan las limitas surpassadas tar 155 objects per lung da vias chantunalas e tar 46 ulteriurs objects per lung da vias communalas. Cun l'augment dal traffic ch'è da spetgar, vegnan probablamain a resultar ulteriurs surpassaments da las limitas. In basegn da sanaziun è avant maun, uschia che l'Uffizi chantunal da construcziun bassa ha elavurà en collavuraziun cun la vischnanca da Tavau in project da sanaziun cunter canera. Quest project cumpiglia l'entir territori communal.

Examinà differentas mesiras
Per reducir efficaziamain la canera da la via stattan a disposiziun principalmain quatter mesiras: deviar il traffic, remplazzar las cuvridas da la via cun cuvridas che reduceschan la canera, construir paraids da protecziun cunter canera u limitar la sveltezza maximala.

Deviar il traffic per exempel tras in sviament, purtass pauc a Tavau. Perquai che Tavau ha mo pauc traffic da transit. La gronda part dal traffic cumenza u finescha a Tavau (traffic da ed a Tavau sco er traffic communal). Medemamain èsi difficil da construir paraids da protecziun cunter canera en il vitg. Quai chaschuna situaziuns che na sa laschan strusch schliar – per exempel sch'in edifizi ha ses access directamain davent da la via chantunala. Er cuvridas da la via che chaschunan pauca canera, èn vegnidas resguardadas per calcular las limitas da canera. La canera vegn reducida grazia a las poras libras da la cuvrida. Sin vias cun in traffic che circulescha svelt ha lieu ina purificaziun natirala. En cas da sveltezzas da main che var 80 km/h – e pia en il vitg – na funcziuna questa purificaziun natirala betg. Las poras vegnan stuppadas, e l'effect da la reducziun da canera va a perder. Plinavant na resistan las poras betg per adina ad ina chargia mecanica intensiva, per exempel tras chadainas da naiv. A Tavau datti dentant cuvridas pli veglias che pon vegnir remplazzadas cun la cuvrida da standard. Questa cuvrida da standard n'è betg ina cuvrida che chaschuna pauca canera en il senn tradiziunal, ella chaschuna dentant tuttina main canera che las cuvridas veglias.

Per reducir la canera a Tavau en moda effectiva e sin l'entira surfatscha restan las reducziuns da la sveltezza la mesira la pli efficazia. Questa mesira è plinavant cleramain pli favuraivla che la construcziun da paraids da protecziun cunter canera u ch'il remplazzament anticipà da la cuvrida da la via. Per il center da Tavau prevesa il project da sanaziun cunter canera d'introducir tempo 30 sin l'entira surfatscha. En ulteriurs quartiers da la vischnanca èn planisadas limitaziuns graduadas da la sveltezza (60 km/h, 50 km/h u 30 km/h). Tras questas reducziuns da la sveltezza vegn la grevezza da canera reducida sistematicamain là, nua che las limitas vegnan surpassadas. Cun realisar las mesiras po il nivel da canera vegnir reducì per 1,5 fin 2 decibels. Per ils surpassaments da la limita da canera restants, vegn dumandada ina facilitaziun da la sanaziun cunter canera.

Cooperaziun da la publicitad
Il project da sanaziun cunter canera vegn exponì publicamain. A partir da glindesdi, ils 11 da november 2024 pon tut las persunas interessadas prender invista dals documents durant las uras d'avertura dal biro en la Chasa communala da Tavau e far protesta fin mesemna, ils 11 da december 2024.

Infurmaziuns:

• Roger Stäubli, schef Construcziun da vias, Uffizi da construcziun bassa, tel. +41 81 257 38 42 (cuntanschibel da las 9.00 fin las 11.00), e‑mail Roger.Stäubli@tba.gr.ch
• Landamma Philipp Wilhelm, vischnanca da Tavau, tel. +41 79 318 77 38, e‑mail philipp.wilhelm@davos.gr.ch

Responsabladad: Uffizi da construcziun bassa