L'ambassadura ucranaisa Iryna Venediktova ha visità oz – sin invitaziun da la Regenza – il chantun Grischun.

L'ambassadura Iryna Venediktova è vegnida beneventada oz en la Chasa grischa a Cuira dal president da la Regenza Jon Domenic Parolini e dal chancelier Daniel Spadin. Vegnida accumpagnada è l'ambassadura da Taras Antoshchak, emprim secretari (dumondas economicas), e d'Olena Bidnova, segunda secretaria (dumondas culturalas, medias). Suenter il barat dals salids uffizials è in gentar cuminaivel stà sin il program..

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: chancelier Daniel Spadin, ambassadura Iryna Venediktova, president da la Regenza dr. Jon Domenic Parolini e l'emprim secretari Taras Antoshchak.

Responsabladad: Regenza