Pervia dal progress tecnologic dals ultims 20 onns sco er pervia da midadas da las prescripziuns dal dretg internaziunal sto il dretg chantunal davart la protecziun da datas vegnir adattà. La Regenza ha deliberà la missiva tar la revisiun totala da la Lescha chantunala davart la protecziun da datas per mauns dal Cussegl grond.

La Lescha chantunala davart la protecziun da datas (LCPD; DG 171.100) è vegnida messa en vigur il 1. da matg 2002. En quests passa 20 onns è ella vegnida adattada mo en paucs puncts. En la medema perioda hai dentant dà gronds progress tecnologics. La reducziun dals pretschs per la capacitad da memorisar datas sco er la disponibladad creschenta d'attatgs d'internet adina pli svelts permettan da retschaiver, da spedir sco er d'arcunar en ina vasta dimensiun datas sur l'internet. Ultra da quai daventa l'elavuraziun e la communicaziun transcunfinala da datas adina pli impurtanta. Per quests motivs èn vegnids revedids e mess en vigur ils ultims onns differents relaschs davart la protecziun da datas sin plaun europeic. Quests relaschs èn liants er per la Confederaziun e per ils chantuns. Els ston vegnir realisads en il dretg chantunal, per che las disposiziuns chantunalas davart la protecziun da datas adempleschian er en l'avegnir il standard europeic. La LCPD sto perquai vegnir revedida totalmain.

Rinforzament dals dretgs da las persunas pertutgadas e da la surveglianza da la protecziun da datas
Ils organs publics ch'èn suttamess a la lescha (autoritads regiunalas, chantunalas e communalas) ston observar in pèr novs instruments e duairs. Quels servan en emprima lingia a rinforzar ils dretgs da las persunas ch'èn pertutgadas d'ina elavuraziun da datas. Plinavant pretenda il dretg surordinà in rinforzament da la surveglianza da la protecziun da datas. Quella vegn ademplida en il chantun Grischun tras l'incumbensada u l'incumbensà per la protecziun da datas. D'ina vart sto vegnir rinforzada l'independenza da quest post. Da l'autra vart survegn el – tras la revisiun da la lescha – novas incumbensas e cumpetenzas. Tut en tut duai la revisiun sa limitar a quels puncts ch'èn absolutamain necessaris per realisar las prescripziuns dal dretg internaziunal.

Il Cussegl grond vegn a tractar il project en la sessiun da favrer 2025.

Agiunta:

Missiva

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad. Las dumondas vegnan coordinadas da Ursina Trautmann, responsabla per la communicaziun dal Departament da giustia, segirezza e sanadad, tel. +41 79 712 51 57, e‑mail Medienstelle@djsg.gr.ch.

Responsabladad: Regenza