Il Post spezialisà per l'integraziun dal Grischun organisescha l'onn proxim ils emprims Dis d'acziun chantunals cunter il rassissem. Els han lieu dals 19 fin ils 23 da mars 2025. Instituziuns, organisaziuns ed uniuns èn dumandadas da contribuir agens projects.

L'onn proxim han lieu dals 19 fin ils 23 da mars 2025 per l'emprima giada en il Grischun ils Dis d'acziun chantunals cunter rassissem. Il Post spezialisà per l'integraziun dal chantun envida instituziuns, organisaziuns ed uniuns da contribuir agens projects per sensibilisar e per cumbatter cunter discriminaziun rassistica.

Per bleras persunas en Svizra è il rassissem ina realitad dal mintgadi. Il Servetsch naziunal per il cumbat cunter il rassissem mussa en il monitoring actual, che mintga sisavla persuna en Svizra inditgescha d'avair subì discriminaziun rassistica. Pertutgadas èn spezialmain persunas pli giuvnas e persunas cun ina biografia da migraziun. Questas cifras mussan, ch'il rassissem na capita betg en cas singuls, mabain ch'el è francà profundamain en modas da pensar ed en cumportaments.

Il Grischun metta in cler signal
Ils 21 da mars è il Di internaziunal dal cumbat cunter il rassissem. Enturn questa data han lieu en tut la Svizra numerus dis d'acziun. L'onn 2025 sa participescha er il Grischun cun agens dis d'acziun chantunals. «Nus stuain metter in cler signal cunter la discriminaziun en il Grischun», accentuescha Felix Birchler, manader dal Post spezialisà per l'integraziun ed incumbensà chantunal d'integraziun. Il post spezialisà appellescha perquai a tut las instituziuns, organisaziuns ed uniuns interessadas da sa participar cun projects innovativs. En differentas modas duain ils projects gidar ad eliminar pregiudizis, a render visibla la discriminaziun ed a promover ina convivenza paschaivla.

Sa participar ed inoltrar projects
Persunas interessadas pon inoltrar lur ideas e lur projects al Post spezialisà per l'integraziun. «Nus ans legrain da stabilir ferms partenadis a chaschun da l'emprima realisaziun e da s'engaschar cuminaivlamain cunter il rassissem», uschia Felix Birchler. Ils criteris da surdada ed ulteriuras infurmaziuns chattais Vus sin la pagina d'internet www.rassismusberatung.gr.ch.

Context
Il Di internaziunal per il cumbat cunter il rassissem dals 21 da mars regorda a la mazzacra da Sharpeville l'onn 1960, nua che 69 persunas che protestavan paschaivlamain cunter l'apartheid èn vegnidas mazzadas en l'Africa dal Sid. Il di regorda sin tut il mund da s'engaschar activamain cunter il rassissem e da s'engaschar per ina societad solidarica, libra ed averta.

Infurmaziuns:

Felix Birchler, manader dal Post spezialisà per l'integraziun / incumbensà chantunal d'integraziun, Uffizi da migraziun e da dretg civil, tel. +41 81 257 36 84 (cuntanschibel da las 10.30 fin las 12.00), e‑mail Felix.Birchler@afm.gr.ch