La Regenza ha approvà la revisiun parziala da l'Ordinaziun d'energia dal chantun Grischun (OEG) e metta en vigur quella per il 1.da schaner 2025.

En la votaziun dal pievel dals 18 da zercladur 2023 è la Lescha federala davart las finamiras en la protecziun dal clima, davart l'innovaziun e davart il rinforzament da la segirezza energetica (Lescha davart il clima e l'innovaziun, LCI) vegnida acceptada sco cuntraproposta indirecta a l'Iniziativa da glatschers. Quest project cumpiglia er ina midada da l'art.50a da la Lescha d'energia (LEn). En il rom da questa midada porscha la Confederaziun a partir dal 1. da schaner 2025 novas motivaziuns, quai cun agid d'in program d'impuls. Sin basa da quai e sin basa da l'Ordinaziun d'energia respectiva (OEn) promova la Confederaziun a partir dal 1. da schaner 2025 mesiras en il sectur da l'effizienza energetica sco er il remplazzament da stgaudaments cun energia fossila e da stgaudaments electrics da resistenza fixs tras ina producziun da chalur ord energias regenerablas. Per quest intent metta ella a disposiziun var 200 milliuns francs per onn, quai per ina durada da 10onns. Il program d'impuls predominescha las cundiziuns da promoziun chantunalas existentas, per consequenza sto la OEG vegnir adattada correspundentamain. Pertutgadas da quai èn las cundiziuns da promoziun chantunalas per stgaudaments da laina, implants solars termics, pumpas da stgaudar sco er indrizs per producir chalur en corporaziuns da chalur. Malgrà l'introducziun dal program d'impuls, na sa mida la procedura da dumandar ina promoziun betg per la petenta u il petent. Dapli infurmaziuns chattan ins en l'Ordinaziun d'energia dal chantun Grischun (OEG) u – cura che l'ordinaziun è en vigur – sin la pagina d'internet da l'Uffizi d'energia e da traffic dal Grischun.

A la vischnanca da Sumvitg sco proprietaria da guaud garantescha la Regenza maximalmain var 1,13 milliuns francs per construir ina gronda saiv da protecziun cunter la selvaschina sur il vitg da Surrein. Quai è l'emprim project da questa dimensiun en il Grischun. Il guaud da protecziun Uaul Puzzastg en il territori dal project na protegia betg mo Surrein cunter sbuvadas, bovas e lavinas, mabain er la via da colliaziun vers Cumpadials e Sumvitg sco er la via vers l'aclaun Val ch'è abità durant l'entir onn. Ulteriuras saivs grondas enturn entirs guauds da protecziun n'èn actualmain betg planisadas.

Suenter ils donns che l'orcan Vivian aveva chaschunà l'onn 1990 tar la populaziun da bostgs vegls, han ins constatà che l'Uaul Puzzastg na protegia betg pli suffizientamain il territori. Perquai han ins prendì a partir dal 1995 pass per pass bleras differentas mesiras forestalas per instradar la regiuvinaziun dal guaud e per cuntanscher in stadi dal guaud stabil. Dapi l'onn 1996 han ins plinavant construì rempars da lavinas da tut en tut 800meters lunghezza. Pli tard han ins er realisà construcziuns cumplementaras e lavurs da sanaziun. Pervia dal squitsch existent memia grond tras donns da ruissas da la selvaschina d'ungla èn ultra da quai vegnidas realisadas differentas mesiras da chatscha, che n'han dentant betg meglierà la situaziun.

Per garantir la regiuvinaziun dal guaud sco er la funcziun da protecziun persistenta da l'Uaul Puzzastg, vegn ussa construida ina gronda saiv da protecziun cunter la selvaschina. Il project cuntegna plinavant mesiras accumpagnantas cunter lavinas e cunter naiv glischnanta per proteger la saiv sco er emplantaziuns da spezias da bostgs adattadas al clima. Tras quai vegn mantegnì u augmentà il nivel da segirezza actual areguard ils privels da la natira.

La Regenza ha approvà il project collectiv «Manaschi e mantegniment da las staziuns IMIS e dals sistems da surveglianza per la perioda 2025–2028» sut la direcziun da l'Uffizi da guaud e privels da la natira. Plinavant ha ella concedì ina contribuziun chantunala maximala da circa 2,59 milliuns francs per quest intent.

Il project collectiv cumpiglia 22 sistems interchantunals da mesiraziun e d'infurmaziun (staziuns IMIS) cun totalmain 50 unitads da masts e 19 sistems da surveglianza, che vegnan coordinads e survegliads dal WSL Institut per la perscrutaziun da la naiv e da las lavinas (SLF). Las datas che vegnan evaluadas cun agid da quests indrizs da mesiraziun servan ad elavurar ils bulletins da lavinas. Ultra da quai vegnan ellas utilisadas dals servetschs da lavinas locals e regiunals. Oravant tut per las vischnancas, per la Viafier retica, per l'Uffizi da guaud e privels da la natira e per ils uffizis districtuals da construcziun bassa èn questas datas ina fitg buna basa da decisiun. La funcziunalitad da quests indrizs è vegnida cumprovada l'emprima giada durant l'enviern da lavinas 1998/99. Tut las datas pon vegnir consultadas online sin l'internet. La rait da mesiraziuns po dentant ademplir sia funcziun mo, sch'ella vegn tgirada e mantegnida permanentamain. Il project collectiv cumpiglia ultra da las staziuns IMIS er differents sistems per survegliar ils privels da la natira.

Sa basond sin il preventiv chantunal 2025 ch'il Cussegl grond ha deliberà ils 3 da december 2024, conceda la Regenza per il 1. da schaner 2025 la cumpensaziun cumplaina da la chareschia. Ils salaris fundamentals da las collavuraturas e dals collavuraturs da l'administraziun chantunala, dals instituts chantunals autonoms da dretg public (cun excepziun da la Banca Chantunala Grischuna) sco er da las dretgiras e da las autoritads da mediaziun e las tariffas da la salarisaziun minimala per las persunas d'instrucziun da las scolas popularas publicas vegnan pia auzads per 0,7 pertschient. Decisiv è il stadi da la chareschia annuala sin basa da l'index naziunal dals pretschs da consum da la fin da november 2024.