La Regenza ha prendì enconuschientscha da la petiziun «Stop da sajettar ils lufs dal Parc Naziunal» da las organisaziuns WWF Svizra, Pro Natura, BirdLife Svizra e da la Gruppa Luf Svizra.

La petiziun ch'è vegnida suttascritta da tut en tut 37 656 persunas, è vegnida inoltrada ils 13 da november 2024 a la Regenza. Cun ella vegn suttamess a la Regenza il giavisch da terminar la regulaziun dal triep da lufs Fuorn, che sa trategna per part en il Parc Naziunal. Da sajettar ils lufs stettia en cuntradicziun cun il princip dal Parc Naziunal da surlaschar la natira a sasezza. Da sajettar l'entir triep senza examinar alternativas saja sproporziunà ed exagerà.

La Regenza constatescha, ch'il triep da lufs cun la designaziun uffiziala «Fuorn» vegn designà sco triep dal Parc Naziunal en il text da petiziun da las organisaziuns cun dretg da far recurs (WWF Svizra, Pro Natura e BirdLife Svizra) e da la Gruppa Luf Svizra. Il triep da lufs Fuorn è in triep transcunfinal. Ses territori da chatscha sa chatta mo per part en il perimeter dal Parc Naziunal Svizzer. Ina gronda part dal territori da chatscha sa chatta ordaifer il territori dal Parc Naziunal en la Val Müstair ed en l'Engiadina Bassa sco er en l'Italia cunfinanta. L'utilisaziun da la designaziun triep dal Parc Naziunal è nunexacta e sugerescha a la populaziun, ch'ins haja dà liber ils lufs en il Parc Naziunal per la regulaziun.

Regenza è conscienta da la responsabladad
En connex cun il luf en il Grischun è la Regenza conscienta da l'impurtanza tant dal Parc Naziunal sco reservat natiral sco er da la protecziun da las spezias. Ella chapescha perquai il giavisch da las petiziunarias e dals petiziunaris. Gronds animals da rapina sco il luf pon avair in effect positiv sin la biodiversitad. Els han il potenzial da reducir la populaziun d'animals cun ungla e d'influenzar lur derasaziun locala. Quest effect po cuntinuar en l'ecosistem, tranter auter cun ina influenza positiva sin la regiuvinaziun dal guaud. Il territori da muntogna e d'alp è però pertutgà spezialmain da la preschientscha dal luf ed en l'avegnir vegn el ad esser pertutgà anc pli intensivamain en l'entir artg alpin. Qua han l'economia d'alp e l'agricultura, che vegnan pratitgadas en moda extensiva ed ecologica, ina impurtanza culturala, economica e sociala considerabla. Er per la protecziun da la natira, en spezial per la biodiversitad, èsi essenzial da mantegnair la cultivaziun dal territori d'alp e da muntogna. Cun la revisiun da la legislaziun federala da chatscha è vegnida stgaffida la pussaivladad da pudair regular cun responsabladad la populaziun da lufs, senza periclitar quella, e da limitar ils donns d'animals da niz, quai en cumbinaziun cun ina protecziun da muntaneras efficazia. Quai duai reducir il potenzial da conflicts, augmentar l'acceptanza per la preschientscha dal luf e la finala pussibilitar ina coexistenza. In tractament spezial per ils trieps da lufs che sa trategnan per part en il Parc Naziunal, procurass per in'applicaziun giuridicamain ineguala da las disposiziuns davart la regulaziun dal luf. Sch'ins vuless midar quai, stuess ins far quai sin plaun federal. I n'è perquai betg pussaivel da dar suatientscha al giavisch da la petiziun.

Infurmaziuns:

Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch