La Regenza ha approvà la revisiun parziala da l'Ordinaziun da linguas dal chantun Grischun.

En la sessiun d'avust 2021 ha il deputà Bondolfi inoltrà ensemen cun 63 sutsegnadras e sutsegnaders ina incumbensa concernent «la consideraziun da las trais regiuns linguisticas en gruppas da lavur, en cumissiuns spezialisadas ed en gremis da relevanza chantunala». Cun quella pretendan las sutsegnadras ed ils sutsegnaders da prevair e da resguardar obligatoricamain en il futur la represchentanza da las trais regiuns linguisticas en gruppas da lavur, en cumissiuns spezialisadas ed en gremis da relevanza chantunala. Tranter auter cun renviar a la difficultad da mintgamai pudair recrutar in'elecziun suffizienta e represchentativa da candidatas e candidats ha la Regenza proponì da midar l'incumbensa en quel senn, ch'i saja da prender en mira ina represchentanza adequata da las trais regiuns linguisticas. En la sessiun da favrer 2022 è l'incumbensa la finala vegnida approvada en il senn oriund – uschia n'èsi betg mo da prender en mira, mabain da garantir che las trais regiuns linguisticas vegnian resguardadas. Per realisar questa incumbensa dovri ina revisiun da l'Ordinaziun da linguas dal chantun Grischun.

En ils gremis chantunals che vegnan elegids da la Regenza u dals departaments e che adempleschan incumbensas publicas impurtantas, sto da nov vegnir garantida ina represchentanza adequata da las trais regiuns linguisticas. En il champ d'applicaziun da la nova disposiziun tutgan da princip tut ils gremis chantunals che vegnan elegids da la Regenza u dals departaments e che adempleschan incumbensas publicas impurtantas.

En il rom da questa revisiun parziala duain plinavant vegnir eliminadas mancanzas en il dretg vertent. Il Post spezialisà per la plurilinguitad, ch'è domicilià sco post da stab tar il Departament d'educaziun, cultura e protecziun da l'ambient, surpiglia da nov explicitamain la responsabladad da dar resposta e da sclerir dumondas en connex cun las linguas naziunalas ed uffizialas dal chantun. Fin ussa era l'Uffizi da cultura il post spezialisà per dumondas generalas en connex cun las linguas naziunalas ed uffizialas dal chantun. En l'avegnir duai l'Uffizi da cultura sa concentrar sin la promoziun da linguas che vegn chapida sco bain cultural.

La Regenza ha approvà la dumonda da la citad da Cuira dals 14 d'avust 2024 concernent l'adattaziun dal plan da la rait da vias da velo (transferiment da singulas lingias en il plan sectorial). Object da questa dumonda èn per entant sulettamain singuls transferiments da lingias existentas en il plan sectorial da la rait da traffic quotidian e da temp liber.

Il plan da la rait da vias da velo è in element dal Plan sectorial Velo. Quel definescha la rait chantunala da vias da velo dal traffic quotidian e da temp liber e furma la basa planisatorica per la promoziun persistenta dal traffic da velos en il chantun Grischun. La citad da Cuira ha fatg in'examinaziun da ses plan da la rait da vias da velo. En quest connex han ins dà in'attenziun speziala a las vias da colliaziun tar ils edifizis publics da la citad e dal chantun. Il plan duai preschentar ina rait da vias spessa, attractiva e connectada che collia impurtants puncts da partenza e da destinaziun e che resguarda ils svilups cuntinuants. Las colliaziuns tar ils ospitals, tar las scolas, tar la Scola auta spezialisada dal Grischun, tar la chasa da scola Ringstrasse e l'implant da sport e tar la staziun planisada Cuira Vest duain surpigliar funcziuns centralas.

La Regenza ha concedì a la citad da Cuira ina contribuziun chantunala da maximalmain circa 4,2 milliuns francs per engrondir la staziun Cuira Vest.

En vista al svilup ch'è giavischà a media ed a lunga vista per il quartier Cuira Vest, vegn la fermada Cuira Vest da la Viafier retica cumplettada ad in center multimodal per il traffic public ed il traffic betg motorisà.

Ultra da novs perruns ed access a tals vegn construida, sut ina nova punt sur la Raschärenstrasse, ina gronda plazza da staziun cun ina fermada da bus e d'auto da posta ed in nov parcadi per 170 velos. Ina nova colliaziun a pe u cun velo maina nà dal vest (cumplex da kino / center da cumpra City West) per lung dals binaris fin a la nova staziun Cuira Vest. Là sutpassa questa colliaziun ils binaris e va – da la vart sid da la scarpa da viafier – vinavant en direcziun center da la citad. Tut en tut custa il project d'engrondir la staziun Cuira Vest circa 67,9 milliuns francs. Il chantun sa participescha cun ina contribuziun da maximalmain var 4,2 milliuns francs als custs imputabels dals stabiliments dal traffic betg motorisà. L'avust 2023 ha la Regenza gia empermess a la citad da Cuira ina contribuziun chantunala da maximalmain 3,7 milliuns francs tenor la Lescha davart il traffic public per engrondir la staziun Cuira Vest.

Visualisaziun 2 / Visualisaziun 3

© OVA Office for Visualization in Architecture 

La Regenza ha approvà il project d'exposiziun per la correcziun da la via da la Muntogna da Schons sin il traject tranter Pazen e Farden en la vischnanca da Muntogna da Schons. Tut en tut custa il project circa 3,54 milliuns francs.

La via da la Muntogna da Schons è ina via da colliaziun chantunala che renda accessibla la vischnanca da Muntogna da Schons. Il traject tranter Donat e Pazen è gia vegnì cumplettà cuntinuadamain durant ils ultims 20 onns. Il traject tranter Pazen e Farden sto vegnir sanà e na correspunda betg pli al standard da construcziun pretendì. Da nov duai quest traject vegnir schlargià ad ina ladezza da 5,8 meters. En quest connex vegni plinavant remplazzà l'allontanament da l'aua e la stresa da fundament. Entaifer il perimeter dal project sa chatta er ina fermada d'auto da posta. En quest lieu vegn la via fatga pli stretga, numnadamain a 3,5 meters. Quai per impedir che vehichels surpassian l'auto da posta, durant che las passagieras ed ils passagiers entran e sortan. Ils custs per construir la fermada d'auto da posta vegnan da princip surpigliads da la vischnanca da Muntogna da Schons. Per l'adattaziun da la fermada tenor ils basegns da las persunas cun impediments sco uschenumnada fermada da cap, conceda la Regenza a la vischnanca da Muntogna da Schons ina contribuziun chantunala da maximalmain 33 000 francs tenor la Lescha federala davart l'egualitad da persunas cun impediments.