Il Program annual 2025 sa cumpona da tut en tut 83 finamiras e cuntegna in grond dumber da terms impurtants e centrals. Cun la realisaziun da las finamiras duai vinavant vegnir meglierada cuntinuadamain l'attractivitad dal chantun Grischun. Ils puncts centrals dal program annual da quest onn èn la realisaziun pass per pass da la Strategia da persunal, la distgargia fiscala per las famiglias e las persunas cun activitad da gudogn, la promoziun da la construcziun d'abitaziuns sco er ils secturs segirezza e traffic. Il Program annual 2025 è l'emprim program annual da la perioda da planisaziun dal Program da la Regenza 2025–2028.
Il program da la Regenza ed il plan da finanzas èn – tenor la Constituziun chantunala – ils instruments centrals da la gestiun strategica e politica dal chantun Grischun. Ensemen furman els la planisaziun a media vista dals puncts centrals da la Regenza. Il Program da la Regenza 2025–2028 sa focussescha sin ils puncts centrals «transfurmaziun digitala», «viver e lavurar», «clima ed ambient» sco er «Grischun attractiv». Ils puncts centrals da svilup dal program da la Regenza vegnan mintgamai concretisads e realisads en ils programs annuals. Il Program annual 2025, ch'è l'emprim program annual da la perioda da planisaziun dal nov program da la Regenza, cumpiglia tut en tut 83 finamiras annualas. El è vegnì tractà dal Cussegl grond en la sessiun da december 2024 en il rom da la missiva dal preventiv. Ils puncts centrals ils pli impurtants da la planisaziun annuala 2025 èn:
Meglierar l'attractivitad sco patrun e distgargias fiscalas sistematicas
Cun realisar pass per pass la Strategia da persunal 2024–2028, che la Regenza ha deliberà il 2024, ha la Regenza la finamira da meglierar sistematicamain l'attractivitad sco patrun. La strategia cumpiglia 13 iniziativas che vegnan realisadas durant la perioda da 5 onns. Puncts centrals per l'onn 2025 èn l'elavuraziun d'in concept per la strategia da recrutaziun e per rinforzar la marca da patrun da lavur, l'elavuraziun d'in concept per il svilup dal persunal e per il management da talents sco er l'ulteriur svilup d'ina cultura d'interpresa cuminaivla. Cun la revisiun da la Lescha da taglia planisada, che distgargia sistematicamain las famiglias e las persunas cun activitad da gudogn, duai vegnir meglierada la posiziun dal Grischun sco lieu d'abitar e sco lieu economic. La missiva è previsa per la sessiun d'avust 2025 dal Cussegl grond e l'entrada en vigur da la revisiun per il 1. da schaner 2026. En cumbinaziun cun la reducziun dal pe da taglia chantunal, ch'il Cussegl grond ha concludì per l'onn fiscal 2024 per las persunas natiralas, duai la revisiun da la lescha mitigiar considerablamain la grevezza fiscala da las famiglias e da las persunas cun activitad da gudogn en il chantun.
Promover la construcziun d'abitaziuns e meglierar sistematicamain il sectur dal traffic public
Cun ina nova lescha duai vegnir tegnì quint dals svilups e da las discussiuns areguard la stgarsezza e l'augment dals pretschs d'abitaziuns. Qua tras duai per l'ina vegnir extendì l'instrument da promoziun cumprovà da l'uschenumnada meglieraziun da las relaziuns d'abitar en il territori da muntogna. Per l'autra vegni staffì in nov instrument da promoziun: il sustegn da purtaders d'abitaziuns d'utilitad publica per construir abitaziuns da locaziun favuraivlas. Il Cussegl grond vegn a tractar la Lescha davart la promoziun d'abitaziuns en il decurs da l'onn.
En il sectur dal traffic vegn l'introducziun planisada dal tact da mes'ura sin il traject Cuira – Son Gagl sco er en la Surselva a procurar per in cler meglierament da la purschida. Ultra da quai vegn elavurada e deliberada da la Regenza la Strategia per il traffic betg motorisà 2037. La strategia furnescha respostas a la dumonda, co ch'il traffic betg motorisà duai sa sviluppar a media fin a lunga vista en il chantun Grischun.
Rinforzar la protecziun da la populaziun ed elavurar las basas strategicas en il sectur da las scolas autas e da la perscrutaziun
En il rom da la revisiun parziala da la Lescha davart la protecziun da la populaziun en il chantun Grischun vegnan francadas adattaziuns organisatoricas dal Stab directiv chantunal sin stgalim da la lescha. Las midadas legalas, respectivamain organisatoricas che sa basan sin talas, duain gidar a rinforzar la protecziun chantunala da la populaziun. En il sectur da la furmaziun e da la perscrutaziun vegn la Strategia chantunala da scola auta e da perscrutaziun adattada a las novas cundiziuns generalas ed actualisada correspundentamain. La Strategia chantunala da scola auta e da perscrutaziun definescha ils puncts centrals e las directivas en il sectur da las scolas autas e da la perscrutaziun. Ella serva a la Regenza sco instrument directiv. En il decurs da quest onn vegnan ultra da quai eruidas las structuras da las purschidas transitoricas e da las scolas professiunalas spezialisadas chantunalas sco er retschertgads ils differents secturs e models da finanziaziun en il sectur da la furmaziun professiunala da basa. Questas documentaziuns duain servir sco basa per las ulteriuras lavurs.
Agiuntas:
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel per telefon da las 13.30 fin las 14.00), e‑mail Marcus.Caduff@dvs.gr.ch
Responsabladad: Regenza