La Regenza ha concedì ina contribuziun chantunala da maximalmain 666 131 francs a la firma Quadrin SA per il project «SmartFlow System». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs d'investiziun importan tut en tut circa 1,61 milliuns francs.

Quadrin è in sistem modular da la construcziun d'elements da lain, che po vegnir dimensiunà ed adattà tenor ils giavischs da la clientella. Il focus respectiv vegn mess sin in aut standard da qualitad, sin products ecologics e regiunals, sin in bun stil architectonic sco er sin in model da finanziaziun intelligent ed attractiv. La soluziun actuala da Quadrin po satisfar mo limitadamain a la dumonda creschenta per edifizis temporars ed als basegns da la clientella. Per tegnair quint da la dumonda creschenta per edifizis temporars pli e pli gronds èsi necessari da digitalisar l'entir process. En il rom dal project «SmartFlow System» duain ils singuls pass digitals existents, sco la planisaziun dals elements e la regulaziun da las maschinas da producziun, vegnir colliads in cun l'auter ed anc vegnir amplifitgads.

A la branscha da construcziun porta il project in concept innovativ e persistent, che ha il potenzial da servir sco prototip per sviluppar process en l'avegnir. Tras sia rolla da pionier pudess il project inspirar autras acturas ed auters acturs da la branscha e dar in impuls per iniziativas sumegliantas.

Ulteriuras infurmaziuns: https://grdigital.digital/

Fotografia © Zindel-United

La Regenza ha approvà in project da sanaziun da la canera en la vischnanca da Vaz Sut. Quel cumpiglia la via chantunala da Vaz Sut sco er las vias communalas Cosenzstrasse e Vordergasse. En il rom dal project da sanaziun da la canera ha la Regenza concedì la permissiun da reducir la sveltezza maximala generala da 50 km/h a 30 km/h respectivamain da 60 km/h a 30 km/h. 

Pervia dal surpassament da la limita d'immissiuns exista in basegn da sanar las vias numnadas qua survart. Sco proprietaris da las vias respectivas èn il chantun e la vischnanca obligads da realisar la sanaziun da la canera. Il perimeter dal project da sanaziun cumpiglia tut las vias chantunalas e communalas ch'èn situadas entaifer ils cunfins da la vischnanca da Vaz Sut e ch'èn relevantas areguard la canera. Pertutgads èn pia tut ils territoris da la vischnanca da Vaz Sut, per ils quals ins ha constatà ina grevezza da canera considerabla sin fundament dal cataster general da la grevezza da canera.