Sut il titel «Empruvar, adattar e multiplitgar – promover la diversitad en las interpresas» envida Diversity-gr, ensemen cun il Biro d'egualitad dal Tessin, ad in barat online interchantunal che ha lieu ils 11 da favrer 2025. L'occurrenza bilingua dat invistas praticas e mussa, co ch'ins po francar la diversitad e l'egualitad cun success en las interpresas. Il focus vegn mess sin la branscha da tecnologia e sin professiuns tecnologicas.

Empruvar, adattar, multiplitgar – ina metoda cumprovada en la perscrutaziun tecnologica. Pertge betg transferir questa metoda sin auters secturs, sco la promoziun da la diversitad en las interpresas? En ils chantuns da muntogna ed en las regiuns perifericas da la Svizra n'èn l'egualitad e l'inclusiun al plaz da lavur betg mo ina sfida speziala, mabain er ina necessitad, sche questas regiuns economicas vulan restar attractivas. Ils models da lavur e las aspectativas da la generaziun dad oz sco er ils plazs da lavur da l'avegnir, che vegnan ad esser pli e pli digitalisads, pretendan novs concepts. En questas regiuns datti mo paucas interpresas grondas cun atgnas partiziuns da persunal. Empè da quai domineschan manaschis pitschens e mesauns. Questas firmas investeschan bler per la scolaziun e per l'introducziun da lur collavuraturas e collavuraturs en la lavur. Savens èn ellas dentant surdumandadas, sche lur emploiadas ed emploiads vulan reducir u adattar lur pensum da lavur – per exempel pervia da la naschientscha d'in uffant, per far ina furmaziun supplementara u per tgirar ina confamigliara u in confamigliar. Lavur parziala, jobsharing u homeoffice para savens dad esser nunpussaivel a l'emprima egliada, perquai che l'entir team sto vegnir integrà ed organisà da nov.

Inspiraziun tras best practice
Malgrà tut las difficultads chattan interpresas grondas sco er manaschis pitschens e mesauns adina puspè soluziuns per accordar lur basegns a quels da lur collavuraturas e collavuraturs – soluziuns che vegnan empruvadas en situaziuns specificas e che pon vegnir multiplitgadas en dimensiuns pli grondas. Questa flexibilitad e questa stima per las collavuraturas ed ils collavuraturs cun experientscha valan la paina e gidan a tegnair forzas da lavur preziusas en las interpresas sco er a rinforzar l'attractivitad dals manaschis en las regiuns. A chaschun dal barat online «Empruvar, adattar e multiplitgar» tematisescha Diversity-gr questas dumondas e sfidas. Uschia sa porscha l'occasiun da sa barattar, d'emprender dals success e dals naufragis d'autras firmas, da survegnir sez dapli plaschair d'experimentar – u forsa simplamain da copiar ils buns recepts d'autras interpresas!

Per sa fatschentar cun quests process dovri cumpromiss – e cunzunt la prontezza d'empruvar insatge nov, da far eventualas adattaziuns e da betg capitular, cura che l'emprim obstachel sa mussa. Quai che sa chapescha da sez en la perscrutaziun ed en l'innovaziun, po gidar a promover la diversitad e l'egualitad. L'occurrenza sa drizza a collavuraturas e collavuraturs da HR, a manadras e manaders d'interpresas, a commembras e commembers da cussegls d'administraziun, a represchentantas e represchentants da federaziuns sco er a tut las persunas interessadas che vulan promover la diversitad e l'inclusiun en il mund da lavur.

Referats d'input e sesidas da breakout
Al cumenzament datti dus referats d'input: Nicola Giambonini, cussegliader d'interpresas e president da l'Associazione industrie ticinesi (AITI), cun «Da l'autra vart da l'etica: diversitad ed inclusiun sco strategia d'interpresa» e Sarah Steiner, CEO e co-fundatura da Tadah, cun «Cumpatibilitad – pertge che interpresas ston midar lur pensar». Suenter han lieu sesidas da breakout, nua che las participantas ed ils participants pon sa barattar davart temas sco «Allyship – ambassadur per l'egualitad», «Topsharing – minimaziun da las ristgas ed effizienza», «Jobsharing – rumper il plafond da vaider en posiziuns da cader» e «Soluziuns sveltas per la cumpatibilitad – lain lavurar cuminaivlamain a favur da soluziuns!». Las sesidas vegnan accumpagnadas da persunas da l'economia. Il program ed ulteriuras infurmaziuns pon vegnir consultads online.

Ina rait cun vast sustegn
Ad interpresas da la branscha da tecnologia sco er ad interpresas cun champs professiunals ch'èn pertutgadas da la transfurmaziun digitala porscha Diversity-gr ina plattafurma ed ina rait per promover la diversitad e l'egualitad en las interpresas. La rait pussibilitescha da barattar experientschas, sensibilisescha per contexts e dat impuls per process da midament. Ella vegn purtada dal Post da stab per l'egualitad da las schanzas per dunnas ed umens, dal Center d'innovaziun da tecnologia CSEM, da l'Academia Raetica, da la rait «Women in Tech Switzerland», da la Scola auta spezialisada dal Grischun, dal Center da las IPM Grischun e da la Scola auta da pedagogia dal Grischun. Diversity-gr vegn sustegnì tras l'Uffizi federal per l'egualitad tranter dunna ed um.

Agiunta:

Flyer davart l'occurrenza

Infurmaziuns:

• Susanna Mazzetta, co-manadra da Diversity-gr, Post da stab per l'egualitad da las schanzas per dunnas ed umens, tel. +41 81 257 35 70 (cuntanschibla da las 08.30 fin las 09.30 e da las 14.30 fin las 17.00), e‑mail Susanna.Mazzetta@stagl.gr.ch
• David Schmid, co-manader da Diversity-gr, CSEM, Head Regional Development & Relations, tel. +41 76 321 72 04, e‑mail david.schmid@csem.ch

Responsabladad: Post da stab per l'egualitad da las schanzas per dunnas ed umens