La stad 2025 lantscha il chantun in project da pilot da 4 onns sut il titel «Post spezialisà e da coordinaziun per la protecziun d'uffants». A persunas dal fatg e da referiment porscha quest post da consultaziun ina cussegliaziun anonima, svelta e gratuita, en cas ch'il bainstar dals uffants pudess esser periclità. La finamira è quella da reducir malsegirezzas, da mussar pussaivladads d'agir concretas e d'involver – en cas da basegn – persunas spezialisadas dal sectur da la protecziun d'uffants.

La protecziun d'uffants pertutga savens situaziuns cumplexas e difficilas da valitar, che na pretendan betg adina intervenziuns immediatas e radicalas. Bler pli savens èn persunas dal fatg u da referiment – sco persunas d'instrucziun, lavureras socialas e lavurers socials, assistentas ed assistents da canortas u trenadras e trenaders d'uniuns da sport – confruntadas cun la sfida da valitar correctamain indizis per svilups disfavuraivels u ensainas da periclitaziuns pussaivlas dal bainstar dals uffants.

Per il bainstar dals uffants e dals giuvenils en il Grischun
Il «Post spezialisà e da coordinaziun per la protecziun d'uffants» porscha ina cussegliaziun anonima, nunbirocratica e svelta. El fa ina triascha e creescha ina rait tranter las persunas participadas per pussibilitar in sustegn sistematic. En cas da basegn pon expertas ed experts d'organisaziuns existentas da la protecziun d'uffants far ina valitaziun fundada dal bainstar da l'uffant u dal giuvenil pertutgà, quai en moda coordinada en ina gruppa da focus.

Cun il post spezialisà e da coordinaziun na duai dentant betg vegnir stgaffida in'organisaziun supplementara. Anzi, la purschida da cussegliaziun da l'Agid a victimas duai vegnir concepida en moda pli nunbirocratica e rendida pli enconuschenta. Ed er la coordinaziun tranter ils differents posts da consultaziun duai vegnir meglierada.

In mussavia cumplementar sustegna supplementarmain las persunas dal fatg e da referiment en connex cun l'identificaziun e la valitaziun da svilups disfavuraivels e da periclitaziuns dal bainstar dals uffants. Il mussavia porscha agids d'orientaziun, sensibilisescha per signals d'avertiment e rinforza la segirezza d'agir en cas d'eventualas periclitaziuns.

Project da pilot a partir da la stad 2025
Il «Post spezialisà e da coordinaziun per la protecziun d'uffants» vegn lantschà la stad 2025 sco project da pilot cun ina durada da 4 onns. La finanziaziun da la purschida per persunas spezialisadas e da referiment per il bainstar dals uffants e dals giuvenils dastga il Grischun engraziar a dunna Rywka Schapiro. Dunna Rywka Schapiro è morta l'onn 2021 ed ha previs ch'ina part da ses relasch giaja a favur da la protecziun d'uffants e da giuvenils en il Grischun.

Infurmaziuns:

• President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 11.30 fin las 12.30), e‑mail Marcus.Caduff@dvs.gr.ch
• Susanna Gadient, manadra da l'Uffizi dal servetsch social, tel +41 81 257 26 51 (cuntanschibla da las 10.00 fin las 12.00), e‑mail Susanna.Gadient@soa.gr.ch

Responsabladad: Regenza