La Regenza ha elegì Ursin Widmer, manader da l'Uffizi da cultura (UdC), sco commember dal cussegl da fundaziun da la Fundaziun per l'orchester da la Svizra taliana per la perioda d'uffizi currenta che dura fin ils 31 da december 2025. El surpiglia il sez vacant da sia antecessura Barbara Gabrielli che ha bandunà l'Uffizi da cultura la stad 2024.

La Fundaziun per l'orchester da la Svizra taliana (FOSI) ha l'intent d'organisar, finanziar ed administrar in orchester permanent che exequescha sia activitad en la Svizra taliana. L'orchester da la Svizra taliana (OSI), cun sedia a Lugano, è vegnì fundà l'onn 1935 sco orchester da la Societad da radio e televisiun da la Svizra taliana. Oz fa el part dals orchesters sinfonics professiunals ils pli impurtants da la Svizra.