La Regenza surdat il Premi grischun da cultura al musicist Walter Lietha. Ultra da quai ha ella stgaffì las premissas legalas per conceder contribuziuns da sustegn per scolaziuns en il sectur da tgira.
Il musicist Walter Lietha survegn il Premi da cultura 2025
La
Regenza surdat a Walter Lietha da Trin il Premi grischun da cultura 2025. Il
premi è dotà cun 30 000 francs. Cun chanzuns
politicas pregnantas e cun musica virtuosa enritgescha il poet, cumponist,
chantadur e ghitarrist da Trin il sentiment da vita da trais generaziuns. Sco
editur e sco collecziunader da cudeschs passiunà procura el decisivamain che
l'istorgia culturala e d'art dal Grischun vegnia conservada.
Plinavant
surdat la Regenza otg premis da renconuschientscha e tschintg premis da
promoziun da mintgamai 20 000 francs.
Glista da tut las persunas premiadas da l'onn 2025
Foto: © Patrick Lindenmaier
La Regenza surdat a Walter Lietha da Trin il Premi grischun da cultura 2025.
Contribuziuns da sustegn per scolaziuns e per il studi en il sectur da tgira
La
Regenza ha approvà la revisiun parziala da l'Ordinaziun tar la Lescha davart
lieus da scolaziun en ils fatgs da la sanadad e socials ed ha uschia creà la
basa legala per sustegnair finanzialmain las persunas en scolaziun sco er las
studentas ed ils students en il sectur da tgira.
Las
contribuziuns da sustegn vegnan concedidas a persunas che absolvan il curs da
furmaziun Tgira SSS u la scolaziun Tgira SAS e che han lur domicil en il
chantun u che exerciteschan in'activitad da gudogn en il chantun sco cunfinaria
u cunfinari. A partir d'immediat fin ils 31 da mars 2025 èsi pussaivel
d'inoltrar a l'Uffizi per la furmaziun media-superiura emprimas dumondas per
l'onn da scolaziun respectivamain da studi 2024/2025, per cumenzar il studi u
la scolaziun durant il semester d'atun 2024: Dumonda per contribuziuns da sustegn Tgira
La Regenza ha approvà la revisiun parziala da l'Ordinaziun tar la Lescha davart
lieus da scolaziun en ils fatgs da la sanadad e socials ed ha uschia creà la
basa legala per sustegnair finanzialmain las persunas en scolaziun sco er las
studentas ed ils students en il sectur da tgira.
Contribuziun chantunala per novas localitads per il center da furmaziun Surselva
La Regiun
Surselva ha inoltrà ina dumonda per il «Center da furmaziun Surselva a Glion,
dischlocaziun sin l'areal da la Viafier retica a la staziun da Glion». La
Regenza ha approvà la dumonda sco fasaII.
En la
fasaI aveva la Regenza approvà l'onn 2020 – sco decisiun da princip – la
dischlocaziun da la Scola mercantila Surselva e da la purschida transitorica
Vinavon sco partiziuns dal Center da furmaziun Surselva sin l'areal da la
Viafier retica a la staziun da Glion. La fasa II cumpiglia
ussa las novas localitads en l'edifizi da la Viafier retica sco er in provisori
sco halla da gimnastica.
Al
purtader vegnan empermess ina contribuziun da construcziun da maximalmain
2 149 000 francs, in pajament anticipà da totalmain
3 496 000 francs per il tschains da locaziun sco er ina
contribuziun da construcziun supplementara da maximalmain
1 843 000 francs per il provisori planisà sco halla da
gimnastica. Ils pajaments respectivs vegnan fatgs cun la resalva ch'il Cussegl
grond approveschia il credit budgetà.
La Regiun Surselva ha inoltrà ina dumonda per il «Center da furmaziun Surselva a Glion, dischlocaziun sin l'areal da la Viafier retica a la staziun da Glion».
Glisch verda per in project da protecziun cunter crudada da crappa da la vischnanca dad Ilanz/Glion
La
Regenza ha approvà il project «Protecziun cunter crudada da crappa Peiden Bogn 2» da l'Uffizi da construcziun bassa en la vischnanca dad
Ilanz/Glion.
La via da Duin en la vischnanca dad
Ilanz/Glion fa ina storta andetga «storta da Miradun» sur la via da Val S. Pieder directamain sur ina paraid-crap quasi verticala. En il rom da l'emprim
project «Protecziun cunter crudada da crappa Peiden Bogn» da l'onn 2016 è
questa paraid-crap gia vegnida segirada. Cun las mesiras ch'ins ha prendì,
n'han ins dentant betg pudì franar ils vasts moviments. La paraid-crap cupitga
vinavant en direcziun da la via da Val S. Pieder e las analisas geologicas
detagliadas laschan spetgar, che la paraid-crap ed ina part da la storta
sbovian ils proxims decennis.
Per impedir quai, han ins elavurà il project
«Protecziun cunter crudada da crappa Peiden Bogn 2».
Quel prevesa da segirar la paraid-crap cunter ina cupitgada cun agid d'ina
vasta francaziun dal grip cun ancras betg tendidas, da francar il pe da la
paraid-crap e da stender ina rait, da prender mesiras per allontanar l'aua en
il sectur intermediar sco er da segirar il mir da sustegn da la via da Duin.
Foto: © Marcel Züger, InfraGeo AG
La Regenza ha approvà il project «Protecziun cunter crudada da crappa Peiden Bogn 2» da l'Uffizi da construcziun bassa en la vischnanca dad Ilanz/Glion.
Approvà la revisiun da la planisaziun locala da la citad da Farschno
La
Regenza ha approvà la revisiun parziala da la planisaziun locala che la citad
da Farschno aveva concludì ils 18 d'avrigl 2024. Uschia vegnan stgaffidas las
premissas per ademplir las prescripziuns dal dretg da planisaziun surordinà.
Sin basa
da la Lescha federala davart la planisaziun dal territori e dal Plan directiv
chantunal en il sectur da l'abitadi ha la citad da Farschno examinà ed adattà
las zonas da construcziun areguard la grondezza, la dimensiun e l'utilisaziun.
Tut en tut ha ella reducì sias zonas d'abitar, maschadadas e dal center per var
2787 meters quadrat. La revisiun da la Lescha communala da construcziun
cumpiglia particularmain l'augment da las cifras d'utilisaziun en la zona
d'abitar e maschadada sco er l'aboliziun da la gronda distanza dal cunfin,
uschia ch'i vegn pussibilità da densifitgar la surfatscha d'abitadi. Plinavant
è vegnida introducida in'obligaziun da construir entaifer in termin dad 8 onns
en zonas da construcziun existentas.
Fotos: © Comet Photoshopping GmbH / Dieter Enz
La Regenza ha approvà la revisiun parziala da la planisaziun locala che la citad da Farschno aveva concludì ils 18 d'avrigl 2024.
Tiptopf talian vegn reelavurà
La
Regenza ha approvà l'elavuraziun dal material talian per il med d'instrucziun
«Tiptopf».
L'onn
2023 è cumparida in'ediziun cumplettamain reelavurada e concepida da nov dal
«Tiptopf» tudestg. L'ediziun taliana actuala è da l'onn 2011. Previsiblamain la
stad 2026 vegn ella ad esser exausta. Perquai sto ella vegnir remplazzada. Il concept ch'è ussa avant maun prevesa da puspè metter a disposiziun a
las scolas dal Grischun talian la translaziun taliana dal med d'instrucziun
«Tiptopf» da la chasa editura Schulverlagplus. Il med d'instrucziun duai
vegnir publitgà il pli tard per l'onn da scola 2026/27.
La Regenza ha approvà l'elavuraziun dal material talian per il med d'instrucziun «Tiptopf».
Nominaziun da Barbara Janom Steiner per il presidi dal cussegl d'administraziun da la Repower SA
La
recrutaziun per il presidi dal cussegl d'administraziun da la Repower SA è
vegnida fatga en cunvegnientscha dals trais acziunaris principals – Ovras
electricas dal chantun Turitg, chantun Grischun e CEIS3/UBS-CEIS2 –
tenor las prescripziuns chantunalas da corporate governance. Cun il nov presidi
vulan ils acziunaris principals rinforzar la tempra grischuna a la testa da la
pli gronda ed unica interpresa d'energia grischuna, ch'è integrada verticalmain
(cf. communicaziun a las medias dals 16-01-2025).
Barbara
Janom Steiner, che fa part dapi l'onn 2023 dal cussegl d'administraziun da la
Repower SA sco represchentanta dal chantun, ademplescha questa finamira en tuts
reguards. Tras sia derivanza e sia carriera professiunala enconuscha ella fitg
bain las relaziuns ed instituziuns chantunalas. Ultra da quai ha ella
colliaziuns excellentas ed ina ordvart gronda experientscha executiva. Sco
commembra dal cussegl d'administraziun enconuscha ella detagliadamain
l'interpresa Repower e la branscha. Ils onns 2008 fin 2018 è Barbara Janom
Steiner stada cussegliera guvernativa dal Grischun. Actualmain presidiescha
ella il cussegl da banca da la Banca naziunala svizra. L'elecziun ha lieu a
chaschun da la radunanza generala da la RepowerSA dals 14 da matg 2025 a
Mustér.
Il mandat
actual da Barbara Janom Steiner sco represchentanta dal chantun vegn perquai er
publitgà da nov tenor las prescripziuns chantunalas da corporate governance. Il
termin d'annunzia dura fin ils 10 da mars 2025. L'elecziun ha medemamain lieu a
chaschun da la radunanza generala da la Repower SA dals 14 da matg 2025.
La recrutaziun per il presidi dal cussegl d'administraziun da la Repower SA è vegnida fatga en cunvegnientscha dals trais acziunaris principals – Ovras electricas dal chantun Turitg, chantun Grischun e CEIS3/UBS-CEIS2 – tenor las prescripziuns chantunalas da corporate governance.
