La Regenza ha avert la consultaziun tar la revisiun parziala da la Lescha da taglia per il chantun Grischun (LT; DG 720.000). Cun questa revisiun vegn realisada l'incumbensa Hohl dals 3 da settember 2022 concernent distgargias fiscalas per famiglias e per persunas spezialisadas.

 

Cumenzament: 3 da fanadur 2024
Fin: 4 da october 2024

La Regenza avra la consultaziun davart la revisiun totala da la Lescha davart la construcziun d'abitaziuns socialas e la meglieraziun da las relaziuns d'abitar en il territori da muntogna (DG 950.250)

 

Cumenzament: 13 da zercladur 2024

Fin: 15 da settember 2024

 

La Regenza ha dà en consultaziun duas revisiuns parzialas da la Lescha da polizia dal chantun Grischun. Cun las midadas respectivas duai la Lescha da polizia vegnir actualisada, per che la Polizia chantunala possia proceder vinavant en moda efficazia ed effizienta cunter acts criminals ed impedir tals en il meglier cas.


Revisiun parziala da la LPol, part 1 (MCS GR e mesiras cunter violenza, smanatschas u persecuziuns)
Cun l'emprim project duain particularmain vegnir stgaffidas las basas giuridicas per il Management chantunal da smanatschas dal Grischun (MCS GR). Quest nov instrument da la polizia da segirezza duai gidar ad impedir grevs acts da violenza intenziunads. Studis cumprovan che delinquentas e delinquents demussan savens tscherts cumportaments (uschenumnads signals d'avertiment) avant che commetter grevs acts da violenza intenziunads. Tals cumportaments èn tipics per in'escalaziun en direcziun da grevs acts da violenza intenziunads ed èn pia in indizi per in tal svilup. Cun il MCS GR duai vegnir stabilì in sistem che promova l'identificaziun da tals signals d'avertiment e che duai procurar, che quests indizis vegnian annunziads a la Polizia chantunala. Uschia survegn la Polizia chantunala la pussaivladad d'identifitgar a temp persunas che han il potenzial da commetter in grev act da violenza intenziunà (uschenumnadas persunas prontas d'utilisar violenza), da valitar il privel che resorta da questas persunas e da neutralisar quest privel cun agid da mesiras coordinadas sin plaun interdisciplinar. Per quest intent collavura la Polizia chantunala stretgamain cun autras autoritads, cun persunas spezialisadas, cun organisaziuns privatas e cun persunas privatas che stattan en contact cun la persuna pronta d'utilisar violenza e cun sias victimas potenzialas. Per pudair applitgar en il chantun Grischun quest instrument da la polizia da segirezza en moda efficazia ed effizienta, èsi necessari da precisar e d'extender las basas giuridicas concernent l'elavuraziun da datas. Las disposiziuns legalas correspundentas duain vegnir adattadas en il rom da la revisiun qua avant maun.


Revisiun parziala da la LPol, part 2 (ulteriuras actualisaziuns dal dretg da polizia)
Cun la segunda revisiun parziala da la Lescha da polizia duain vegnir actualisads plirs champs dal dretg da polizia. En emprima lingia duai vegnir facilità il barat da datas tranter las autoritads da segirezza. Smanatschas da la segirezza publica n'enconuschan nagins cunfins geografics. Per pudair sa defender cunter talas smanatschas, ston las autoritads da segirezza barattar infurmaziuns en ina moda uschè simpla e nunbirocratica sco pussaivel ina cun l'autra. Per facilitar il barat d'infurmaziuns èn vegnids lantschads differents projects sin plaun interchantunal e naziunal, quai cun la finamira da colliar ina cun l'autra las bancas da datas chantunalas da polizia, uschia che las infurmaziuns polizialas pon vegnir consultadas directamain. Plinavant èn en elavuraziun differents sistems d'analisa criminala che duain permetter d'administrar e d'analisar las datas sin plaun interchantunal. Da quests instruments po il chantun Grischun profitar mo, sch'il dretg da polizia porscha las basas giuridicas necessarias. Uschenavant che questas basas giuridicas ston vegnir francadas sin il stgalim da la lescha, duain ellas vegnir stgaffidas cun la revisiun qua avant maun.

Cumenzament: 1 da zercladur 2024
Fin: 31 da avust 2024

In salvament svelt e d'auta qualitad è da gronda impurtanza per il Grischun sco chantun muntagnard cun sias 150 vals e ses abitadis decentrals.
La finamira dal project da lescha qua avant maun è quella da crear cundiziuns generalas, uschia ch'i po vegnir gidà svelt ed optimalmain a mintga persuna ch'è en privel, ch'è malsauna u che ha gì in accident.

 

Cumenzament: 1. da matg 2024

Fin: 31 da fanadur 2024

La Lescha chantunala davart la protecziun da datas (LCPD; DG 171.100) è vegnida messa en vigur il 1. da matg 2002. En quests passa 20 onns è ella vegnida adattada mo sporadicamain. En la medema perioda èn però vegnids fatgs gronds progress tecnologics. Ils pretschs sbassants per la capacitad da memorisar sco er la disponibladad creschenta d'attatgs d'internet adina pli svelts avran en ina dimensiun bler pli vasta che pli baud la pussaivladad da retschaiver, da spedir sco er d'arcunar datas sur l'internet. Ultra da quai daventa la dimensiun transcunfinala d'elavuraziuns da datas adina pli impurtanta. Per quests motivs èn vegnids decretads resp. revedids ils ultims onns differents relaschs davart la protecziun da datas sin plaun europeic. Quests relaschs èn liants er per la Confederaziun e per ils chantuns e ston vegnir realisads en il dretg chantunal, per che las disposiziuns chantunalas davart la protecziun da datas adempleschian er en l'avegnir il standard europeic. En spezial per la lavur da la polizia vegni uschia garantì, ch'ella haja vinavant access al sistem d'infurmaziun da Schengen (SIS).

La LCPD sto perquai vegnir revedida totalmain. En quest connex duai la revisiun sa limitar a quels puncts ch'èn absolutamain necessaris per realisar las prescripziuns dal dretg internaziunal. Ils organs publics ch'èn suttamess a la lescha duain observar in pèr instruments e duairs novs, che servan en emprima lingia a rinforzar ils dretgs da las persunas pertutgadas, da las qualas vegnan elavuradas datas. Plinavant pretenda il dretg surordinà in rinforzament da la surveglianza da la protecziun da datas, che vegn ademplida en il chantun Grischun da l'incumbensada u da l'incumbensà per la protecziun da datas. D'ina vart sto l'independenza da quest post vegnir rinforzada. Da l'autra vart survegn ella – tras la revisiun da la lescha – novas incumbensas e cumpetenzas.

Cumenzament: 25 da schaner 2024
Finiziun: 24 d'avrigl 2024

La regenza ha avert la consultaziun per ina revisiun parziala da la Lescha da taglia per il chantun Grischun (LT; DG 720.000) sco er da la Lescha per promover il svilup economic en il Grischun (LSE; DG 932.100).

Cumenzament: 15 da schaner 2024
Fin: 15 d'avrigl 2024

La Regenza ha dà en consultaziun la revisiun parziala da la Lescha davart ils dretgs politics (simplificaziun da la procedura electorala en il chantun Grischun per las elecziuns chantunalas e regiunalas da maiorz a l'urna: cedels electorals per far ina crusch).

Cumenzament: 15 da schaner 2024
Fin: 15 d'avrigl 2024

La Regenza ha dà en consultaziun la revisiun parziala da la Lescha davart ils dretgs politics (via da recurs tar elecziuns dal Cussegl grond e rectificaziuns formalas).

Cumenzament: 15 da schaner 2024
Fin: 15 d'avrigl 2024

La Regenza ha avert la consultaziun tar il sboz per il relasch d'ina Lescha davart la promoziun e la finanziaziun da mesiras per la protecziun dal clima e per l'adattaziun al clima en il Grischun.  (BR 820.400)

 

Cumenzament: 9 da schaner 2024

Fin:  10 d'avrigl 2024

La Regenza ha deliberà il sboz per la revisiun parziala da la Lescha davart il sustegn da persunas basegnusas (LS; DG 546.250).

Cumenzament: 7 da december 2023
Fin: 6 da mars 2024

La Regenza ha lantschà la consultaziun tar la revisiun parziala da la Lescha davart las scolas popularas dal chantun Grischun (DG 421.000)

Cummenzament: 31 d'avust 2023

Fin: 28 november 2023

La Regenza ha avert la consultaziun tar la revisiun parziala da la Lescha davart las scolas autas e la perscrutaziun.

 

Cummenzament: 30 matg 2023

Fin: 28 d'avust 2023

Ils 19 da zercladur 2020 ha il Parlament federal deliberà ina midada da la Lescha federala davart l'assicuranza da malsauns (LAMal; CS 832.10). La midada regla l'admissiun dals furniturs da prestaziuns a l'activitad ambulanta a quint da l'assicuranza obligatorica da malsauns (AOMal). Ils chantuns èn da nov cumpetents per ina procedura d'admissiun formala dals furniturs da prestaziuns (art. 36 LAMal) sco er per la surveglianza dals furniturs da prestaziuns (art. 38 LAMal). Ultra da quai vegn la limitaziun da las medias e dals medis activs en il sectur ambulant reglada da nov tras ils chantuns (art. 55a LAMal).

Cun la revisiun parziala da la Lescha davart l'assicuranza da malsauns e la reducziun da las premias (LARP; DG 542.100) qua avant maun vegn transferida a l'Uffizi da sanadad la cumpetenza per l'admissiun dals furniturs da prestaziuns a l'activitad ambulanta a quint da la AOMal sco er per la surveglianza dals furniturs da prestaziuns admess. Ultra da quai duai la Regenza esser cumpetenta per limitar il dumber da medias e medis ch'èn activs en il sectur ambulant. Ils princips per fixar ils dumbers maximals da medias e medis activs en il sectur ambulant, vegnan medemamain reglads en la lescha.


Cumenzament: 15 d'avust 2022
Fin: 13 da november 2022

 

Cun e-government è manegià che incumbensas da l'administraziun publica vegnan ademplidas cun agid da tecnologias d'infurmaziun e da communicaziun modernas. Igl è in grond e creschent basegn da la populaziun e da las interpresas da liquidar las fatschentas cun las autoritads en moda segira sin via electronica. En quest connex ha la Regenza deliberà ils 26 da zercladur 2018 la Strategia dad e-government dal chantun Grischun 2019 fin 2023. Questa strategia serva a sviluppar vinavant en moda sistematica, effizienta e coordinada la furniziun da prestaziuns digitalas en il chantun. Il project legislativ qua avant maun creescha las basas giuridicas ch'èn necessarias per realisar la Strategia dad e-government.
La legislaziun davart il e-government duai promover la furniziun da prestaziuns digitalas en il chantun. En quest connex duai l'utilisaziun da prestaziuns administrativas digitalas esser voluntara, simpla e senza barrieras – tant per la populaziun sco er per interpresas. Tut las prestaziuns administrativas duain però star a disposiziun er vinavant en furma betg electronica. Perquai ch'il e-government è in fenomen che pertutga pliras instituziuns publicas, duain vegnir creadas – en il rom dal project legislativ – las basas giuridicas per ina collavuraziun pli stretga tranter ils differents plauns statals (Confederaziun, chantuns, regiuns e vischnancas). Tras la legislaziun vegnan plinavant creadas las premissas per las infrastructuras da basa ch'il chantun metta a disposiziun en il sectur da la furniziun da prestaziuns digitalas. Latiers tutga en spezial in portal central dad e-government. Sur quest portal pon la populaziun e las interpresas duvrar prestaziuns electronicas da las autoritads chantunalas en moda centrala e cun las medemas datas d'access. A las vischnancas ed ad auters purtaders d'incumbensas publicas duai vegnir pussibilità – sut tschertas premissas – d'utilisar l'infrastructura da quest portal per porscher lur atgnas prestaziuns administrativas a la populaziun ed a las interpresas.
Las basas giuridicas vertentas da la Lescha davart la giurisdicziun administrativa (LGA; DG 370.100) impedeschan per part la communicaziun electronica cumpletta cun las autoritads en proceduras administrativas. Tras ina revisiun parziala da la lescha duai esser admissibel en l'avegnir da consegnar inoltraziuns sco er da communitgar disposiziuns sin via electronica.

 

Cumenzament: 15 da avust 2022
Fin: 13 da november 2022