Ina svelta e fitg buna superaziun da catastrofas e da situaziuns d'urgenza è da gronda impurtanza per il Grischun sco chantun muntagnard cun sias 150 vals e ses abitadis decentrals.
Ils ultims onns han ils stabs directivs communals ed il Stab directiv chantunal (SDC) pudì rimnar experientschas impurtantas en connex cun la superaziun da catastrofas e da situaziuns d'urgenza (bova a Bondo, incendis da guaud en la Moesa, pandemia da COVID-19, bova da Brinzauls, conflict en l'Ucraina e.u.v.). Questas experientschas duain ussa vegnir resguardadas en questa revisiun parziala da la Lescha davart la protecziun da la populaziun. Vegnir integradas en la revisiun parziala duain er differentas mesiras che la Scola politecnica federala ha proponì en sia evaluaziun dal management da crisas dal chantun Grischun durant la pandemia da COVID-19.
La pussaivladad da nominar in stab directiv regiunal duai per exempel vegnir fixada da nov explicitamain en la LPPC. Quai per precisar ina pussaivla collavuraziun intercommunala. Ultra da quai na duai la direcziun dal Stab directiv chantunal betg pli midar vi e nà tranter la Polizia chantunala e l'uffizi cumpetent per la protecziun da la populaziun, mabain vegnir ademplida permanentamain da l'uffizi cumpetent. Er en l'avegnir vegn la Polizia chantunala bain ad esser preschenta al lieu dal donn sco emprima partenaria da la protecziun da la populaziun, ella vegn dentant a surpigliar la direcziun mo en num dal SDC, fin che tal surpiglia questa funcziun.

Cumenzament: 21 d'avust 2024
Fin: 21 da november 2024