La Regenza ha deliberà per la consultaziun il sboz per ina revisiun parziala da la Lescha da taglia e da la Lescha davart il svilup economic. Cun l'adattaziun da la Lescha da taglia duain las vischnancas grischunas vegnir participadas commensuradamain a las eventualas entradas supplementaras ord la taglia minimala da la OECD. La Lescha davart il svilup economic duai vegnir cumplettada cun in nov instrument da promoziun, numnadamain cun ils credits da taglia rembursabels qualifitgads (QRTC). Cun agid da quels vegn segirada e rinforzada l'attractivitad da l'economia locala e la cumpetitivitad dal chantun Grischun.

Il pievel ed ils chantuns han approvà ils 18 da zercladur 2023 l’introducziun da la taglia minimala da la OECD en Svizra. Cun la midada da la Constituziun federala è vegnida creada la basa legala per garantir l’imposiziun minimala da 15 pertschient per gruppas d’interpresas cun ina svieuta da passa 750 milliuns euros en furma d’ina taglia cumplementara. Las entradas da la taglia cumplementara da la Confederaziun van per 75 pertschient a favur dals chantuns. Ils chantuns èn obligads da participar las vischnancas commensuradamain a las entradas. Da la taglia cumplementara vegnan ils chantuns ad esser pertutgads en moda fitg differenta. Per il Grischun èsi da quintar mo cun entradas pitschnas ed actualmain betg quantifitgablas.

Resguardond il grond engaschament dal chantun per promover il Grischun sco plazza economica propona la Regenza da reparter las entradas da la taglia cumplementara en ina relaziun da 75 pertschient a favur dal chantun e da 25 pertschient a favur da las vischnancas. La repartiziun da l’entira cumpart da las vischnancas sin las singulas vischnancas duai vegnir fatga en relaziun cun las taglias sin il gudogn da las persunas giuridicas ch’il chantun incassescha annualmain.

Plinavant ha la Regenza l’intenziun d’introducir in nov instrument per garantir la cumpetitivitad dal Grischun sco plazza economica. L’armonisaziun da la concurrenza fiscala internaziunala per las grondas gruppas d’interpresas ha per consequenza che la politica internaziunala dal lieu vegn translocada sin instruments da promoziun betg fiscals. Per sviluppar vinavant la politica dal lieu propona la Regenza d’introducir credits da taglia rembursabels qualifitgads (Qualified Refundable Tax Credits u QRTC). Cun quest instrument pon vegnir rinforzadas las activitads d’interpresa da l’economia publica ch’èn giavischadas e degnas da vegnir promovidas. Latiers tutgan l’augment decisiv da la valurisaziun chantunala, il rinforzament da la perscrutaziun e dal svilup sco er da la forza innovativa da las interpresas e l’engaschament da las interpresas en il sectur da la persistenza ecologica.

Cumenzament: 15 da schaner 2024
Fin: 15 d'avrigl 2024