Han las persunas estras da quellas vischnancas, che concedan a lur populaziun estra il dretg da votar e d'eleger en chaussas communalas, er il dretg d'eleger tar las elecziuns dal Cussegl grond?

Na! L'artitgel 9 da la Constituziun chantunala (CC; DG 110.100) pretenda da princip il dretg da burgais svizzer per il dretg da votar e d'eleger. La Constituziun permetta a las vischnanca mo da conceder a las persunas estras il dretg da votar sco er il dretg d'eleger activ e passiv en chaussas communalas (guardar art. 9 al. 4 CC). En cas da las elecziuns dal Cussegl grond sa tracti dentant d'ina elecziun en in'autoritad chantunala. Per quella vala l'art. 9 al. 1 CC, q.v.d. per las elecziuns dal Cussegl grond han exclusivamain las burgaisas svizras ed ils burgais svizzers il dretg d'eleger.

Han las Svizras ed il Svizzers a l'exteriur il dretg d'eleger il Cussegl grond?

Gea, er las Svizras ed ils Svizzers a l'exteriur han il dretg d'eleger il Cussegl grond (guardar art. 3 al. 2 e 3 da la Lescha davart ils dretgs politics en il chantun Grischun [LDPC; DG 150.100]).