Pon er candidatas e candidats suttascriver la proposta electorala?

Gea. Las candidatas ed ils candidats pon er suttascriver sezzas e sezs lur proposta electorala.

Tge pretensiuns valan per suttascriver la proposta electorala?

Nagin na po suttascriver dapli ch'ina proposta electorala. Cas cuntrari vegn il num stritgà sin tut las propostas electoralas (art. 13 LECG). Per mintga sutsegnadra e sutsegnader sto vegnir procurada in'attestaziun dal dretg da votar tar la vischnanca da domicil pertutgada resp. la vischnanca sto confermar questa attestaziun sin il formular tras la suttascripziun e tras il bul uffizial (art. 10 OECG). I vegn recumandà da sa procurar intginas suttascripziuns da reserva per mintga proposta electorala. Uschia sa laschi evitar ch'ina proposta electorala daventa nunvalaivla, perquai che las indicaziuns d'ina sutsegnadra u d'in sutsegnader èn incumplettas, illegiblas u per auters motivs nunvalaivlas resp. perquai che nums ston vegnir stritgads pervia da suttascripziuns multiplas, cun la consequenza ch'il quorum da 5 suttascripziuns valaivlas na vegniss betg cuntanschì.

Ston candidatas e candidats che figureschan a medem temp sco sutsegnadras e sutsegnaders sin ina proposta electorala, er anc inoltrar in'attestaziun dal dretg da votar ultra da l'attest d'elegibladad?

Na. Cun tuttas duas attestaziuns cumprova la persuna respectiva d'avair ses domicil politic en ina tscherta vischnanca. Da pretender duas giadas questa cumprova na fa betg senn. L'attest d'elegibladad basta. Dentant stoi vegnir resguardà ch'ina suttascripziun vegn quintada sco tala mo, sche la persuna respectiva ha ses domicil politic en ina vischnanca dal circul electoral (entant ch'ina candidata u in candidat po esser domicilià en x-ina vischnanca dal chantun Grischun).

Pon las commembras ed ils commembers d'ina dretgira chantunala suttascriver ina proposta electorala?

Gea. Bain exista la pussaivladad ch'ina sutsegnadra u in sutsegnader remplazza ina deputada u in deputà dal Cussegl grond sco suppleanta u suppleant. Tranter l'uffizi da derschadra u da derschader ed il mandat en il Cussegl grond exista dentant ina incumpatibilitad. Sch'ina sutsegnadra u in sutsegnader vegniss pli tard en la situaziun ch'ella u el stuess remplazzar (duraivlamain u ad hoc) ina deputada u in deputà dal Cussegl grond sco suppleanta u suppleant, stuess ella u el sa decider per in dals dus uffizis. Ord vista giuridica na datti dentant nagins motivs cunter ina suttascripziun da la proposta electorala.