Per s'approfundar Elavuraziun:

Uniun Reliefs, en collavuraziun cun il Post spezialisà per l'integraziun da migrantas e migrants e per la prevenziun dal rassissem IMR da Friburg

1. Tgenins dus pregiudizis vegnan intermediads al cumenzament dal film?

Ils Nairs han malsognas sexualas (vul dir malsognas che vegnan transmessas sexualmain).
Ils Nairs han uffants illegitims (quai che n'era betg permess en la societad americana da quel temp).

2. Tge intent han ils dus pregiudizis tenor tia opiniun?

Ils dus pregiudizis donnegeschan la reputaziun da las persunas nairas, perquai ch'i vegn pretendì che lur disas sexualas na sajan betg cumpatiblas cun la «morala» alva. Quest maletg vegn stgaffì per svalitar las persunas nairas e per svegliar in sentiment d'aversiun en la populaziun alva.

3. Tge funcziun ha l'um ch'intermediescha ils dus pregiudizis?

El è il schef d'ina citad dals Stadis Unids da l'America (en Svizra correspunda questa funcziun al president communal).

4. Tge finamira persequitavan ils Alvs cun svalitar vinavant ils Nairs suenter l'onn 1865 (aboliziun da la sclavaria en ils Stadis Unids da l'America)?

La pretensiun ch'ils Nairs valian pli pauc serviva als Alvs sco giustificaziun per dar als Nairs fitg nauschas pajas per lur lavur. Grazia a las forzas da lavur bunmartgadas pudevan tranter auter ils possessurs da plantaschas s'enritgir vinavant. Il status dals Nairs sco persunas che valevan pli pauc, pareva «normal» ad ina gronda part da la populaziun. Ultra da quai na vulevan ils Alvs betg perder lur numerus privilegis, perquai che tals pussibilitavan ad els meglras cundiziuns da viver (furmaziun, sanadad, spazi d'abitar, segirezza, dretgs da burgais, access a la cultura e.u.v.).