Post spezialisà per l'integraziun dal Grischun
Nus infurmain davart il tema integraziun en il sectur da migraziun ed essan il post da consultaziun per tut las abitantas ed ils abitants dal chantun.
Infurmaziun
Vulais Vus savair nua che Vus chattais in curs da lingua per Voss collega da lavur da lingua estra? Essas Vus vegnids da l'exteriur en il chantun Grischun e tschertgais infurmaziuns per As orientar en il mintgadi? Planisais Vus in project d'integraziun en Vossa vischnanca e vulais savair tge ch'igl è da resguardar?
Tar nus chattais Vus ina vasta purschida d'infurmaziuns davart las dumondas relevantas per l'integraziun e nus As renviain ad uffizis u a persunas spezialisadas che pon gidar ad ademplir Voss giavischs.
Consegna ed emprest da material d'infurmaziun
En nossa infoteca chattais Vus diversas broschuras d'infurmaziun davart temas impurtants da la vita en differentas linguas sco er litteratura spezialisada, revistas e DVDs.
Purschidas da curs da lingua e d'integraziun
Vulais Vus amplifitgar Vossas enconuschientschas da la lingua locala e tschertgais in curs adattà en Vossa regiun? Vulais Vus savair co che Vus pudais sustegnair Voss uffant, sch'el crescha si cun pliras linguas? Avais Vus dumondas pertutgant il sistem da furmaziun da la Svizra?
Nus As purschain ina survista da las pussaivladads ch'i dat en il chantun ed As gidain a chattar la dretga purschida per Vus.
Cussegliaziun da lingua (mardi e gievgia)
Nus As cussegliain persunalmain ed As mussain vias per emprender cun success la lingua locala. Tar nossa cussegliadra spezialisada pudais Vus plinavant far in test da classificaziun che As mussa, tge nivel e tge curs ch'è adattà per Vus.
Profitai da nossa cumpetenza e cussegliaziun, nus essan qua per Vus!