Il Grischun sco plazza economica
Il Grischun è il lieu ideal – per l'economia ed er per viver. In clima fiscal ch'è favuraivel per l'economia, persunal ch'è scolà fitg bain, ina gronda productivitad da lavur ed ina buna infrastructura porschan avantatgs dal lieu, e quai betg mo ad interpresas che lavuran sin plaun internaziunal, mabain gist er a manaschis pitschens e mesauns. Qua chattais Vus infurmaziuns per interpresas existentas e novas en il chantun.
Infurmaziuns per patrunas e patruns
Las interpresas han la pussaivladad d'annunziar las plazzas libras da lur manaschi u da tschertgar sezzas candidatas e candidats adattads per las plazzas libras.
Per lavur temporara da notg, da dumengia e da squadra sto vegnir dumandada ina permissiun, medemamain per l'engaschament da forzas da lavur estras.
Las interpresas survegnan ina indemnisaziun finanziala en cas da lavur reducida u en cas da lavur da mal'aura. Questas indemnisaziuns duain impedir da pronunziar desditgas, pervia da perditas da lavur inevitablas e da curta durada.
L'approvaziun dals plans per manaschis industrials e per manaschis betg industrials cun in privel considerabel da manaschi ha l'intent che las prescripziuns davart la protecziun da la sanadad e davart la segirezza a la plazza da lavur ston vegnir ademplidas gia en la fasa da planisaziun d'in manaschi e betg pir suenter il cumenzament dal manaschi.
Register da commerzi e register funsil
Il register da commerzi è public e tuts pon pretender extracts e copias da las actas. En il register funsil vegnan inscrits tut ils bains immobigliars. Permissiuns èn necessarias per acquistar e per engrevgiar terren agricul sco er per acquistar abitaziuns da vacanzas.
Taglias
L'administraziun da taglia è responsabla per exequir la lescha da taglia per il chantun Grischun e la lescha federala davart la taglia federala directa sco er per restituir la taglia anticipada a las persunas natiralas.