La finamira da l'ePPC è da simplifitgar e d'accelerar il process da permissiun per tut las persunas participadas, e quai cun:

• manar las petentas ed ils petents tras il process d'inoltrar ina dumonda da construcziun ed evitar uschia documents incumplets;
• sustegnair las petentas ed ils petents ed ils uffizis cun porscher instrucziuns, glistas da controlla, models ed infurmaziuns;
• evitar la spediziun per posta ed uschia documents sin palpiri;
• augmentar l'effizienza cun registrar e spedir digitalmain ils documents per la permissiun da construcziun;
• gudagnar temp grazia a l'elavuraziun parallela dals uffizis participads;
• coordinar a moda effizienta la procedura: las acturas ed ils acturs vegnan manads tras ils process;
• crear transparenza per tuttas e tuts: il stadi actual da la dumonda è visibel;
• garantir in svelt access electronic als documents actuals durant e suenter la procedura;
• armonisar automaticamain las funtaunas da datas externas: p.ex. datas SIG e REA (register federal dals edifizis e da las abitaziuns);
• permetter ina communicaziun pli simpla cun las petentas ed ils petents e tranter ils uffizis.

Ils custs da svilup e da gestiun per la plattafurma vegnan surpigliads dal chantun. L'utilisaziun dad ebau.gr.ch sur il program da navigaziun en l'internet è gratuita per las petentas ed ils petents sco er per ils uffizis da construcziun communals. Sch'ina vischnanca giavischa ina colliaziun cun sia software existenta per administrar fatschentas, surpiglia ella sezza ils custs da colliaziun che vegnan chaschunads da ses offerent dad IT.

Las vischnancas n'èn betg obligadas d'utilisar ebau.gr.ch. Ellas decidan sezzas, sch'ellas vulan porscher tuttas duas variantas: inoltrar dumondas da construcziun via l'ePPC e sco fin qua per posta. Las experientschas en chantuns che han gia introducì ina procedura electronica per la permissiun da construcziun mussan che las vischnancas nizzegian gugent la soluziun digitala.

Suenter l'introducziun da l'ePPC restan vinavant valaivlas las proceduras per la permissiun da construcziun usitadas, pia betg digitalisadas. Las autoritads ston damai acceptar vinavant documents per la permissiun da construcziun en furma betg digitalisada. Per motivs da l'egualitad giuridica e dal scumond d'arbitrariadad na dastgan ils obstachels da la procedura da permissiun digitala ultra da quai betg esser memia auts, cas cuntrari fiss quai in sforz factic d'applitgar l'ePPC.

Las experientschas en auters chantuns mussan che las petentas ed ils petents èn averts per soluziuns digitalas, perquai ch'ellas simplifitgeschan e rendan pli transparents ils process. Sche quai vegn ad esser il cas er en il Grischun, po la procedura digitala vegnir rinforzada vinavant.

L'obstachel d'utilisar ebau.gr.ch via il navigatur-web n'è betg fitg aut. I duess damai er esser attractiv da nizzegiar l'ePPC per vischnancas pitschnas cun paucas dumondas da construcziun, surtut, perquai ch'el porscha era blers avantatgs per las petentas ed ils petents e per autras persunas participadas. Cura che l'ePPC vegn introducida, mettain nus a disposiziun material d'infurmaziun ed organisain scolaziuns. Sin fundament da quai pon las vischnancas decider, sch'ina midada al nov sistem cunvegn per ellas.

Igl è planisà d'introducir l'ePPC successivamain l'onn 2024. A partir da quel mument pon las vischnancas cumenzar ad utilisar l'ePPC u spetgar anc in temp e sa participar pli tard. Cura che l'ePPC vegn introducida, purschain nus era scolaziuns per l'applicaziun da l'ePPC.

Il mument che l'ePPC è en funcziun vegn la plattafurma sviluppada ed optimada vinavant cuntinuadamain. L'applicaziun da l'ePPC permetta era da scuvrir meglieraziuns pussaivlas, problems inizials u novas funcziuns giavischaivlas. Ultra da quai sto l'ePPC pudair reagir sin midadas da las cundiziuns da basa tecnicas, organisatoricas u giuridicas. Ils pass fin a l'introducziun da l'ePPC:

Il 2019 è vegnì lantschà il project d'unifitgar ils formulars communals per las dumondas da construcziun ed ils formulars chantunals. En il rom da quest project ha l'UST gia manà plirs discurs cun represchentant:as da las vischnancas e dals uffizis chantunals. Ils resultats da quest project vegnan integrads directamain en il project da l'ePPC.

En l'ePPC vegnan ils pass da la procedura represchentads tenor las basas legalas (LPTGR, OPTGR). Ulteriurs pass specifics da las vischnancas che concernan surtut process administrativs interns na pon betg vegnir resguardads en l'ePPC. Vischnancas che han in'atgna software da construcziun pon laschar integrar quella via l'interfatscha en l'ePPC e represchentar uschia en quel lur agens process interns.

Divers chantuns han gia introducì ina procedura digitala u èn vidlonder da sviluppar ina tala. Cun intgins da quests chantuns è la direcziun dal project ePPC en contact. La finamira è da nizzegiar ina da questas soluziuns gia sviluppadas e d'adattar quella a las pretensiuns dal chantun Grischun. Quai permetta da spargnar custs e da nizzegiar sinergias.

Las experientschas da quests chantuns mussan che las vischnancas dattan resuns positivs en connex cun la soluziun digitala. En tut ils chantuns utiliseschan adina dapli vischnancas questas plattafurmas, perquai ch'ellas èn ina gronda distgargia per las persunas involvidas.

Colliaziuns a las soluziuns d'auters chantuns:

• chantun da Turitg
• chantun da Berna
• chantun da Lucerna
• chantun Uri

Sche la LPTGR u las legislaziuns spezialas na prevesan nagut auter, vala er en connex cun l'ePPC il princip ch'ils fatgs da construcziun èn chaussa da las vischnancas (art. 85 al. 1 LPTGR).

Perquai valan las prescripziuns da construcziun communalas independentamain da la tscherna da la procedura per la permissiun da construcziun (digitala u analoga). Las prescripziuns communalas èn determinadas en las leschas da construcziun da las citads e vischnancas ed en lur ordinaziuns executivas.

I na dovra naginas adattaziuns legalas (LPTGR) per introducir ed applitgar l'ePPC.

Il diever dad ebau.gr.ch via in navigatur-web è gratuit per petentas, petents e vischnancas. Per integrar la software da construcziun existenta (p.ex. Gemdat u CMI) en ebau.gr.ch vegn la vischnanca a stuair surpigliar ils custs.

L'ePPC permetta d'examinar e d'elavurar en il futur tut ils documents necessaris en la procedura per la permissiun da construcziun. Per elavurar las dumondas èsi eventualmain da cumplettar l'infrastructura: p.ex. moniturs pli gronds per elavurar ils plans en furma da PDF. En il rom da l'introducziun da l'ePPC survegnan las vischnancas recumandaziuns concretas.

Natiralmain ston las applitgadras ed ils applitgaders da l'ePPC emprender d'enconuscher ils process, las funcziuns e las pussaivladads da l'ePPC. Per quest intent èsi planisà da metter a disposiziun instrucziuns ed agids d'applicaziun e d'organisar scolaziuns. La software duai dentant esser applitgabla tant sco pussaivel a moda intuitiva e porscher divers sustegns per render l'elavuraziun pli simpla ed effizienta (p.ex. infurmaziuns automaticas, cura ch'ins ha da far ils proxims pass d'elavuraziun).

Tut las persunas participadas ed autorisadas han invista en ils dossiers da las dumondas da construcziun via ebau.gr.ch cun in navigatur-web e pon elavurar els. Sch'ina vischnanca nizzegia ina software da construcziun che sustegna l'interfatscha eCH-0211 da l'ePPC (p.ex. CMI Bau, gemdat bau), po ella incumbensar in furnitur da servetschs dad IT da colliar la software cun l'ePPC. Uschia po ella nizzegiar er en il futur la software da construcziun e na dovra betg l'access via il navigatur-web.

Na. L'ePPC po vegnir utilisada cun in navigatur-web usità gist uschè bain sco cun ina software da construcziun. Ina software da construcziun permetta però da represchentar meglier process interns da la vischnanca.

L'ePPC vegn a disponer d'ina interfatscha da standard eCH-0211. Sche la software da construcziun sustegna quella, po ella vegnir colliada cun l'ePPC. Per las soluziuns da software gemdat bau e CMI Bau, utilisadas d'intginas citads e vischnancas, è ina colliaziun garantida. Colliar e configurar la software è dentant cumpiglià cun temp e custs.

Sch'ina vischnanca vuless cumprar ina software per administrar ils fatgs da construcziun, sto ella far stim che quella sustegnia l'interfatscha eCH-0211.

Nus recumandain da nizzegiar las funtaunas da datas existentas per evitar tant sco pussaivel lavur dubla cun registrar ed elavurar las dumondas da construcziun. Ils dossiers surpiglian automaticamain las datas dal sistem d'infurmaziun geografica (SIG) dal Chantun e dal register federal dals edifizis e da las abitaziuns (REA). Cura che la collaudaziun è terminada, pon las datas actualisadas vegnir transferidas automaticamain al REA.

L'ePPC sustegna l'examinaziun e l'elavuraziun da las dumondas da construcziun en pliras modas, numnadamain cun

• sustegnair la registraziun da las dumondas
  L'ePPC maina las petentas ed ils petents tras il process da registraziun. Quai gida gia durant la registraziun a far las indicaziuns necessarias ed inoltrar ils documents correspundents tenor las prescripziuns legalas. L'ePPC renda attent, sch'i mancan indicaziuns e documents u sche quels èn incumplets.
• infurmar davart il proxim pass d'elavuraziun
  Ils differents pass da la procedura per la permissiun da construcziun èn registrads en l'ePPC. Perquai infurmescha l'ePPC automaticamain las persunas cumpetentas, cura ch'ellas ston elavurar vinavant il dossier.
• integrar automaticamain las datas externas
  Datas externas (p.ex. dal SIG u REA) vegnan surpigliadas automaticamain en il dossier. Uschia scrodan tschertas lavurs da retschertga per examinar ils dossiers.
• pussibilitar l'examinaziun simultana da differents uffizis
  L'ePPC permetta d'examinar bler pli spert las dumondas da construcziun. Cun telechargiar ils documents e plans sin la plattafurma da l'ePPC è il dossier spert disponibel per tut ils uffizis communals e chantunals.

La preexaminaziun dals documents per la permissiun da construcziun correspunda ad in vast basegn en la pratica. Ina posiziun da l'autoritad da construcziun en il rom d'ina preexaminaziun è in'infurmaziun nunlianta che succeda cun resalva d'ina decisiun. Ils process d'in giudicament provisoric tenor l'art. 41 OPTGR vegnan represchentads en l'ePPC.

Da princip cuvra l'ePPC il process fin che l'autoritad cumpetenta dat la permissiun da construcziun. La procedura durant las lavurs da construcziun inclus las controllas e la collaudaziun èn ina chaussa individuala da las vischnancas e perquai na cuvra l'ePPC betg quella. Ma la collaudaziun sco tala po vegnir activada en l'ePPC sco pass autonom. Questa acziun armonisescha las datas cun il REA ed infurmescha ulteriurs uffizis involvids (p.ex. geomet:ras, assicuranza d'edifizis, uffizi per la valitaziun d'immobiglias).

Sche las vischnancas vulan utilisar l'ePPC, vegnan ellas a consultar ed ad elavurar ils dossiers inclus ils documents e plans surtut al computer. En questa moda pon ellas nizzegiar il meglier ils avantatgs da la digitalisaziun (p.ex. las datas èn spert disponiblas per tut las persunas participadas, las funtaunas da datas externas sa laschan integrar automaticamain, etc.). Perquai èsi bun, sche las vischnancas disponan da gronds u da plirs moniturs e laptops (p.ex. per examinar il material da las dumondas). En cas da basegn pon ins era stampar ils plans u pretender els en furma stampada da las petentas e dals petents.

Igl è fitg impurtant che las petentas ed ils petents possian utilisar l'ePPC via la plattafurma ebau.gr.ch a moda simpla ed intuitiva. Quai è vegnì garantì gia en la fasa da concept da l'ePPC: represchentant:as dals uffizis communals e chantunals sco era petent:as han examinà ils prototips.

In grond avantatg da la digitalisaziun è ch'ins po colliar ils pass d'elavuraziun ed ils documents cun funcziuns ed instrucziuns d'agid utilas. Uschia pon ins per exempel deponer sin la plattafurma instrucziuns, glistas da controlla, exempels d'applicaziun, agids da dissegn e models ed integrar quels directamain en ils pass da project correspundents.

Na, tenor la situaziun giuridica actuala pon las petentas ed ils petents nizzegiar vinavant la via analoga per inoltrar dumondas da construcziun. En l'interess da las vischnancas duessan els dentant vegnir motivads d'utilisar ebau.gr.ch.

Las petentas ed ils petents che registreschan lur dumonda da construcziun via ebau.gr.ch pon telechargiar sin la plattafurma ils documents correspundents en furma da PDF (p.ex. plans u expertisas). Per concluder la registraziun ston els stampar ina quittanza da lur dumonda e trametter quella per posta a l'uffizi da construcziun. Igl è dentant era vinavant pussaivel d'inoltrar dumondas da construcziun per posta.

Per ina registraziun ed elavuraziun simpla fissi giavischaivel, sche las dumondas da construcziun na stuessan betg pli vegnir suttascrittas a maun. Quai pussibilitass ina procedura cumplainamain digitala. Per realisar quai stuess ins dentant anc crear las basas legalas correspundentas sin plaun chantunal. La lescha vertenta na lubescha anc nagina suttascripziun digitala. In project che prevesa d'adattar la lescha per pussibilitar suttascripziuns digitalas en il chantun Grischun è en elavuraziun. Fin ch'igl è uschè lunsch ston las petentas ed ils petents suttascriver ina quittanza da lur dumonda e trametter quella per posta. Questa soluziun è cumparegliabla cun la decleraziun da taglia online.

Uschè ditg ch'il Chantun na relascha naginas prescripziuns en connex cun l'exposiziun publica e cun la furma dals documents ch'èn d'inoltrar, èn las vischnancas cumpetentas d'organisar e da realisar l'exposiziun publica tenor l'art. 45 al. 3 OPTGR. Tenor il dretg da procedura èsi perquai pussaivel da far l'exposiziun publica sco fin uss en furma da palpiri, ma er en furma digitala u en ina furma maschadada. Per las burgaisas ed ils burgais sto l'exposiziun publica esser garantida. La vischnanca è perquai obligada da crear las premissas tecnicas, organisatoricas e localas correspundentas.

L'ePPC dispona da funcziuns per facilitar l'invista en ils dossiers durant l'exposiziun publica. Ella permetta per exempel da dar in access digital a las burgaisas ed als burgais che han dumandà da prender invista dal dossier.

Uschè ditg che la suttascripziun digitalisada n'è betg reglada en la giurisdicziun administrativa, sto l'entira correspundenza da proceduras da protesta e da recurs vegnir fatga vinavant en furma da palpiri. La correspundenza na vegn betg digitalisada. Ils termins currents en la procedura communala e chantunala pon però vegnir registrads e represchentads en l'ePPC. La procedura da recurs davant las instanzas giudizialas n'è betg l'object da l'ePPC.

L'ePPC n'è betg adattada per archivar ils dossiers. Quels restan dentant disponibels en il sistem e pon vegnir consultads vinavant. L'ePPC porscha ultra da quai ina funcziun d'export. Per archivar ils dossiers (surtut las permissiuns) dovri en il futur ina soluziun separada.

Cun l'ePPC na datti naginas midadas da las directivas vertentas per tegnair en salv ed archivar documents. Igl è dentant necessari da garantir da tut temp access als documents digitalisads.

Las permissiuns da construcziun inclus las permissiuns supplementaras integrantas sco quellas da la polizia da fieu, da la protecziun da las auas, da la protecziun civila, etc. èn da tegnair en salv permanentamain. Las vischnancas èn cumpetentas da reglar il sistem da l'archivaziun e determineschan la furma lianta dals documents (actas). Quella po esser da palpiri, digitala u maschadada. Igl è permess da converter digitalmain documents sin palpiri e viceversa. Basas legalas:

• Lescha davart la gestiun da documents e l'archivaziun dals 28-08-2019 (LGDA; DG 490.000)
• Ordinaziun tar la Lescha davart la gestiun da documents e l'archivaziun dals 22-12-2015 (OGDA; DG 490.010)
• Directivas davart ils temps minimals da tegnair en salv las archivalias da las vischnancas dal chantun Grischun, relaschadas da la Regenza ils 16 d'avust 1982.

Sch'ina vischnanca utilisescha l'ePPC, duain las burgaisas ed ils burgais vegnir motivads d'inoltrar las dumondas a moda digitala. Las petentas ed ils petents na pon dentant betg vegnir sfurzads da far quai, uschia ch'igl è da quintar en il futur vinavant cun dumondas inoltradas sin palpiri.

En l'ePPC vegni a dar ina funcziun per registrar ed elavurar digitalmain ed a moda simpla dumondas inoltradas sin palpiri. Per pudair far quai vegn ins a stuair scannar ils documents (p.ex. enfin format A3). Uschia pon las dumondas era vegnir transmessas sin via digitala als uffizis chantunals cumpetents.

L'ePPC na mida nagut vi da las directivas vertentas per tegnair en salv ed archivar documents. Ins po damai archivar quels sin palpiri, a moda digitala u en ina furma maschadada. L'archiv existent na sto betg vegnir digitalisà. L'ePPC vegn a porscher la pussaivladad d'exportar dossiers en furma da PDF.

Il chantun Grischun elavura il mument in sistem IAM («Identity and Access-Management»). En quest sistem pon sa registrar tut las persunas e survegnir in conto da burgaisa resp. da burgais. Tut las persunas che giavischan in access al sistem ePPC ston avair in conto da burgaisa resp. da burgais.

En l'ePPC pon las vischnancas attribuir a differentas persunas (p.ex. petent:as, autur:as da projects, commembr:as da l'autoritad e da la cumissiun da construcziun, cussegliadr:as extern:as) divers dretgs d'invista e d'elavuraziun.

Il sistem da l'ePPC sto satisfar a las prescripziuns chantunalas davart la protecziun da las infurmaziuns e la segirezza da las datas e vegn examinà d'expert:as da segirezza da l'IT avant ch'el vegn mess en la rait, ma era durant ch'el è en funcziun.

Per che las applitgadras ed ils applitgaders da l'ePPC en las vischnancas possian emprender d'enconuscher ils process, las funcziuns e las pussaivladads da l'ePPC, porscha l'UST instrucziuns, agids d'applicaziun ed organisescha scolaziuns. Quest support stat a disposiziun a las vischnancas a partir da l'introducziun da l'ePPC l'onn 2024.

La software duai dentant esser applitgabla a moda uschè intuitiva sco pussaivel. Quai vul dir ch'i na dovra betg enconuschientschas approfundadas da l'IT per pudair nizzegiar l'ePPC. Il cuntrari: l'ePPC vegn a facilitar l'elavuraziun da las dumondas da construcziun. Las persunas involvidas survegnan per exempel e-mails generads automaticamain, cura ch'ellas han da far ils proxims pass d'elavuraziun.

In support per ils uffizis communals e chantunals è en preparaziun en il rom dal svilup da l'ePPC. Las prestaziuns exactas e la participaziun als custs èn anc da sclerir.