Noss post da servetsch ademplescha sias incumbensas en il rom da la surveglianza da las vischnancas, refuorma da las vischnancas e da la gulivaziun da finanzas. Nus survegliain las finanzas e cussegliain las vischnancas en dumondas da finanzas e da contabilitad sco er en dumondas da l'administraziun en general. Ultra da quai redigin, elavurain e publitgain nus datas finanzialas voluminusas. Nus cussegliain er las vischnancas en dumondas da refurma da structura e las accumpagnain durant in project da fusiun. Durant la fasa da realisaziun d'ina fusiun cussegliain nus las vischnancas en dumondas giuridicas, organisatoricas e finanzialas.
Noss servetsch da surveglianza, da revisiun e da cussegliaziun cumpiglia tut las 101 (2021) vischnancas dal Grischun. Per las vischnancas con problems finanzials è noss servetsch dentent bler pli intensiv che per per las autras vischnancas. Las activitads e las prestaziuns da servetsch las pli impurtantas èn:
- examinaziun preliminara giuridica da constituziuns communalas sco er da statuts da las vischnancas burgaisas, da las regiuns e da las corporaziuns da vischnancas
- controlla ed evaluaziun statistica dals quints annuals da tut las vischnancas e da tut las vischnancas burgaisas
- la revisiun dals quints annuals
- cussegliaziun da las vischnancas (chanzlistas e chanzlists communals, suprastanzas communalas, cumissiuns da gestiun) en fatgs da finanzas e da quints (contabilitad, quint annual, preventiv, plan da finanzas) sco er en dumondas da l'administraziun e dal dretg administrativ en general
- instrucziun da las chanzlistas e dals chanzlists communals; support en fatgs da quints
- cussegliaziun ed accumpagnament da las vischnancas en cas da projects d'investiziun
- servetschs da mediaziun en dumondas da finanziaziun (padrinadis)
- realisaziun da la statistica da las finanzas da las vischnancas ed infurmaziun en chaussa, tant entaifer l'administraziun sco er vers anora (instituts da credit, vischnancas da padrinadi, universitads, instituts da scolas autas e.u.v.)
- collavuraziun tar occurrenzas da scolaziun ed elavuraziun interna d'enconuschientschas professiunalas en il sectur da finanzas e da vischnancas
- post spezialisà per fatgs communals
Noss post da servetsch cusseglia ed accumpogna las vischnancas che han l'intenziun d'adattar las structuras a lur basegns. L'uffizi porscha ses sustegn avant il project da fusiun sco tal, durant ch'il project è instradà ed er suenter che la votaziun davart la fusiun ha gì lieu. Tut tenor il basegn pon vegnir tratgas a niz las suandantas prestaziuns:
Avant che cumenzar cun in project:
- occurrenzas d'infurmaziun per las autoritads
- cussegliaziun davart l'andament e davart l'organisaziun d'in project
- sesidas inizialas (kick-off)
Duront il project:
- cooperaziun en las gruppas da lavur
- cussegliaziun en dumondas specificas relevantas per la fusiun (p.ex. finanzas, vischnanca burgaisa, agricultura, scola, selvicultura, num da la vischnanca fusiunada e.u.v.)
- intermediaziun dals contacts cun auters posts chantunals spezialisads
- collavuraziun cun las cussegliadras e cun ils cussegliaders externs
- agid per rediger e per far l'examinaziun preliminara giuridica dal contract da fusiun
- eruida da las prestaziuns chantunalas en cas d'ina fusiun
- cooperaziun a la strategia da communicaziun e d'infurmaziun
- scleriment da las dumondas processualas
Suenter che la votaziun en las vischnancas ha gì lieu:
- agid per las lavurs da realisaziun (consolidaziun da las finanzas, ev. activitad da revisiun, organisaziun da la chanzlia e.u.v.)
- examinaziun preliminara da la nova constituziun
- ev. agid e cussegliaziun per novs relaschs giuridics
En il rom da la gulivaziun da finanzas ha noss uffizi differentas incumbensas executivas:
- elavurar basas da decisiun per il departament e per la regenza (calcular il potenzial da resursas, l'index da resursas, las contribuziuns da finanziaziun e d'equipament per la gulivaziun da las resursas [GRes], las contribuziuns per la gulivaziun da las grevezzas geografic-topograficas e da scola [GGG] e per la gulivaziun individuala d'inegualitads per grevezzas spezialas [GIG]); coordinar las lavurs cun quels uffizis che administreschan datas per la gulivaziun da finanzas
- calcular e pajar las contribuziuns; exceptadas èn contribuziuns da la GGG pervia dal factur "quota da scolaras e scolars" sco er contribuziuns da la gulivaziun da las grevezzas socialas (GGS); metter a quint las contribuziuns da finanziaziun per la gulivaziun da las resursas a las vischnancas cun bleras resursas
- controllar l'efficacitad da la gulivaziun da finanzas e scriver periodicamain in rapport davart l'efficacitad; incumbensar las vischnancas da consegnar las datas communalas necessarias e las orientar en furma adattada davart il funcziunament e davart ils effects da la gulivaziun da finanzas
- post spezialisà per la gulivaziun da finanzas intercommunala