Il tema intelligenza artifiziala (IA) chatta grond interess – er en l'administraziun chantunala dal Grischun. Qua chattais Vus ina survista da las activitads en il sectur da la IA.
L'intelligenza artifiziala porscha bleras pussaivladads per administraziuns publicas, porta però er sfidas e ristgas. Perquai persequitescha l'administraziun chantunala dal Grischun intensivamain il svilup rasant da las tecnologias da la IA. L'applicaziun da la IA vegn menziunada en la «Strategia Administraziun digitala Grischun 2024–2028» sut la finamira strategica «Innovaziun e gruppas en mira». L'administraziun chantunala vul survegnir in maletg cumplessiv da las tendenzas tecnologicas relevantas e realisar novas ideas. Il chantun Grischun reguarda en quest connex ina transparenza uschè gronda sco pussaivel e garantescha in tractament etic e confurm al stadi da dretg.
Analisa dal potenzial en collavuraziun cun auters chantuns
Actualmain na datti nagina survista cumplessiva davart ils secturs, en ils quals che la AI po far pli effizientas las administraziuns publicas u meglierar ils servetschs per la populaziun e per l'economia. Per chattar ora, nua che la IA po vegnir applitgada en moda raschunaivla, han ils chantuns Grischun, Son Gagl, Turgovia, Appenzell Dadens, Appenzell Dadora ed il Principadi da Liechtenstein laschà far in'analisa cuminaivla dal potenzial. Actualmain vegni examinà, nua ed en tge dimensiun che la IA po porscher ina plivalur. Mo soluziuns che pon vegnir applitgadas cun responsabladad e che servan al bainstar general vegnan silsuenter examinadas pli detagliadamain. Ils resultats duain gidar a sviluppar vinavant ils process administrativs ed a meglierar sistematicamain ils servetschs a favur da la populaziun e da l'economia. Grazia a la stretga collavuraziun pon ils tschintg chantuns ed il pajais Liechtenstein barattar experientschas e profitar da sinergias.
Supplementarmain a l'analisa interchantunala dal potenzial vegnan realisads emprims projects da pilot en l'administraziun chantunala dal Grischun per obtegnair experientschas davart il diever e davart la realisaziun tecnica da tecnologias da la IA. Gia duvrada vegn l'applicaziun per translaziuns automaticas da texts en las trais linguas uffizialas tudestg, rumantsch e talian. Questa applicaziun vegn duvrada cunzunt per translaziuns internas. Texts ch'èn destinads per la publicitad vegnan vinavant elavurads dal servetsch da translaziuns da la Chanzlia chantunala.
Il post da consultaziun central rinforza il barat da savida
Il Post da stab Administraziun digitala coordinescha – sco post da consultaziun central – entaifer ed ordaifer l'administraziun areguard temas da la IA. Ensemen cun l'Uffizi d'informatica persequitescha el las stentas da regular la IA sin plaun naziunal ed internaziunal e tgira il barat cun autras autoritads ed instituziuns. Uschia rinforza il post da stab la colliaziun e facilitescha il barat da savida.
Mussavia e purschida da furmaziun supplementara per collavuraturas e collavuraturs
In grond giavisch da l'administraziun chantunala èsi d'accumpagnar las collavuraturas ed ils collavuraturs ad emprender ed a trair a niz tecnologias da la IA. Novas purschidas da furmaziun supplementara ed in mussavia promovan la sensibilisaziun per in'utilisaziun segira e da responsabladad.