Essas Vus represchentanta u represchentant d'ina vischnanca?
Alura As infurmain nus qua gugent davart la collavuraziun tranter l'administraziun chantunala e las vischnancas.

La «Strategia Administraziun digitala chantun Grischun 2024–2028»

Cun la «Strategia Administraziun digitala chantun Grischun 2024–2028» vul la Regenza grischuna augmentar la sveltezza per far avanzar cun gronds pass la transfurmaziun digitala da l'administraziun chantunala. Questa strategia cuntegna 13 finamiras e 31 mesiras che sa basan sin las finamiras. In pais spezial vegn mess sin la collavuraziun cun las vischnancas. Quella è numnadamain in factur central per arrivar cun success ad in'administraziun digitala generalmain colliada sin plaun communal e chantunal, quai ch'è dal tuttafatg en l'interess da la populaziun e da l'economia. 

Post da coordinaziun per las vischnancas

Per intensivar la collavuraziun tranter l'administraziun chantunala e las vischnancas vegn actualmain installà in post da coordinaziun per las vischnancas. En in emprim pass vegnan eruidas las pretensiuns ed ils basegns cuminaivels. Ultra da quai vegnan examinads a curta fin a media vista emprims projects da pilot (guardar Infrastructura da basa dal e-government).

Plinavant sustegna il post da coordinaziun las vischnancas en connex cun la lantschada da la transfurmaziun digitala. El cusseglia las vischnancas en dumondas da la digitalisaziun dals servetschs administrativs, coordinescha il barat cun persunas spezialisadas relevantas ed accumpogna il transfer da savida tranter l'administraziun chantunala e las vischnancas sco er tranter las vischnancas sezzas.

Il Post da coordinaziun per las vischnancas è domicilià tar il Post da stab Administraziun digitala dal Departament da finanzas e vischnancas. La persuna da contact è Anita Capaul (guardar Contact).

Utilisaziun cuminaivla da l'infrastructura da basa dal e-government

L'administraziun chantunala è londervi d'installar ina infrastructura da basa segira per il e-government. Quella cumpiglia per exempel il ePortal (eportal.gr.ch), in login unifurm, l'identitad electronica e la plattafurma da consegna (chascha da brevs digitala). Questa infrastructura da basa è amplifitgabla, uschia ch'ella po vegnir duvrada en il futur er da las vischnancas.

Ina digitalisaziun generala serva a meglierar la collavuraziun cun ils posts da servetsch chantunals ed è d'avantatg per la publicitad. Uschia pudessan la populaziun e l'economia numnadamain per exempel duvrar il medem login per ils pli differents servetschs administrativs – saja quai chantunals u communals – sin ina plattafurma centrala.


Avais Vus dumondas u inputs? Alura As annunziai tar nus!

Anita Capaul, responsabla dal Post da coordinaziun per las vischnancas
Tel. +41 81 257 35 61
anita.capaul@dfg.gr.ch
www.digitaleverwaltung.gr.ch


Qua pudais Vus chargiar giu il fegl d'infurmaziun davart il Post da coordinaziun per las vischnancas.