La Regenza cumpensescha la chareschia mintgamai la fin da l'onn per il proxim onn chalendar. Il stadi da l'index naziunal dals pretschs da consum da la fin da november è decisiv per quest intent.

Tenor las indicaziuns da l'Uffizi federal da statistica era il INPC per la fin da november 2024 109,3 puncts. La differenza envers il stadi da l'index gulivà per la fin da november 2023 importa plus 0,8 puncts. Il INPC decisiv è uschia per 0,7 pertschient pli aut ch'il stadi da l'index, sin il qual sa basan las pajas dapi il 1. da schaner 2024.

La determinaziun da la cumpensaziun da chareschia è vegnida discutada cun la Cumissiun da persunal. La Regenza ha concludì sin quai la cumpensaziun da chareschia cumplaina dad 0,7 % per il 1. da schaner 2025. La chareschia vala uschia fin in stadi da l'index da 108,5 puncts sco gulivada (basa da l'index december 2005 = 100 puncts). La cumpensaziun da chareschia che vegn concedida, vala per las collavuraturas ed ils collavuraturs da l'administraziun chantunala, per ils instituts chantunals autonoms da dretg public sco er per las dretgiras e las autoritads da mediaziun chantunalas e per las tariffas da la salarisaziun minimalas per las persunas d'instrucziun da las scolas popularas publicas.

Per la communicaziun da la Regenza dals 12 da december 2024...

A las tabellas dals salaris…