Ils tetgs spundivs èn drizzads si e la fasa da las lavurs da construcziun bruttas è terminada cun quai. Quest term impurtant dal project po vegnir festegià entaifer il termin suenter in temp da construcziun dad in zic dapli che in onn en preschientscha da circa 200 mastergnants, planisaders e projectaders participads cun ina festa da ventschida tradiziunala.

Las lavurs da stgavament per il fossal han cumenzà la fin da schaner 2017. L'areal d'ina grondezza da 50 000 meters quadrat è vegnì dividì en tschintg secturs da construcziun, sin ils quals è vegnì bajegià il medem mument. La planisaziun da l'andament e la coordinaziun dals puncts cuminaivels tranter ils singuls secturs da construcziun èn stadas ina gronda sfida per ils planisaders e per ils lavurants.

Lavurs pretensiusas vi da la construcziun brutta
Per eriger la construcziun brutta èn vegnids duvrads 14 000 meters cubic betun da construcziun e 1300 tonnas atschal d'armadira. Las bleras inserziuns en la construcziun brutta per ils numerus e fitg differents indrizs da la tecnica da chasa e da la segirezza che han stuì vegnir montads a temp malgrà in aut ritmus da lavur han difficultà las lavurs dals installaturs. Ils tetgs spundivs consistan d'elements da lain prefabritgads en la dimensiun da 580 meters cubic lain da construcziun. Il volumen dal tetg vegn duvrà sco spazi per ils indrizs da la tecnica da chasa, perquai ch'ins ha desistì per gronda part – pervia da l'aut nivel da l'aua sutterrana – da construir plauns sutterrans che avessan custà fitg bler. Cun montar ils ultims elements dal tetg da la halla polivalenta èn las lavurs da lainari terminadas e la festa da ventschida po vegnir celebrada oz cun il plaschair da quai ch'è vegnì prestà.

La part centrala dal perimeter da segirezza exteriur, il mir circumdant d'ina autezza da set meters e d'ina lunghezza da 950 meters è er construì. Grazia ad ina soluziun innovativa cun dus chars d'armadira mobils han pudì vegnir betunads 12,5 meters per di da lavur. Cun il grond mir circumdant duai d'ina vart vegnir impedì che praschuniers pon rumper ora e da l'autra vart ch'ins ha invista da la praschun. Per integrar il betun opticamain en la prada, en las saivs vivas ed en ils ers circumdants è el vegnì maschadà levamain cun pigments da colur.

Effizienza energetica malgrà grondas pretensiuns a la segirezza
Malgrà las grondas pretensiuns da segirezza a la construcziun, sco per exempel fanestras da vaider nunrumpaivel, han las directivas dal standard Minergie® pudì vegnir observadas tar la nova construcziun. Applitgadas èn vegnidas materialias duraivlas ch'èn bain mantegniblas. Uschè savens sco pussaivel èn er vegnidas duvradas construcziuns en lain. Las parts architectonicas ed il dimensiunament da la protecziun termica per l'enviern e per la stad correspundan a las pretensiuns dal manaschi. Cun differentas mesiras sco l'utilisaziun da lampas LED sco er da regulaziuns accordadas ina cun l'autra (automaziun d'edifizi) tar la glisch artifiziala e tar il far sumbriva, tar il stgaudament e tar la ventilaziun sco er en la cuschina dal manaschi ed en la lavandaria, vegn il consum d'energia reducì ad in minimum. In aut grad d'electricitad producida sez cun agid da dus implants gronds da fotovoltaica sustegna supplementarmain questas stentas.

Durant il temp da planisaziun e da construcziun vegnan integrads cuntinuadamain enconuschientschas actualas, novaziuns tecnicas e svilups dal project en il process da construcziun, uschia ch'i stat a disposiziun in edifizi che correspunda als basegns actuals da l'execuziun da chastis cun tut en tut 152 plazzas il mument ch'el vegn prendì en funcziun la fin da l'onn 2019. Il project cun custs bruts da 119 milliuns francs è sin buna via tant areguard ils termins sco er areguard ils custs.