A chaschun da la votaziun dals 17 da matg 2009 ha il pievel svizzer acceptà la midada correspundenta da la lescha davart ils documents d'identitad. Per il 1. da mars 2010 introducescha la confederaziun en l'entira Svizra datas biometricas en ils differents documents d'identitad (passaport, legitimaziun da persunas estras ed ev. cartas d'identitad). Per registrar las fotografias e las datas èn previs en il Grischun – sin basa dal conclus da la regenza – ils dus centers da registraziun a Zernez ed a Cuira. L'infrastructura correspundenta è vegnida realisada entaifer curt temp e stat ussa a disposiziun cun las resursas persunalas.

Tras sia situaziun centrala è il center da documents d'identitad a Cuira en la Gäuggelistrasse 7, plaun C, ("posta blaua"), cuntanschibel fitg bain tant cun meds da transport publics sco er privats. Las localitads vegnan prendidas en locaziun da la fundaziun d'investiziun da la Credit Suisse / Wincasa SA.

Sin ina surfatscha da circa 440 m² cumpiglian las localitads sis staziuns per registrar las datas biometricas, trais spurtegls, indesch plazzas da lavur en il backoffice, la stanza dal server e la stanza da sesidas. Cunquai ch'i vegnan spetgads mintg'onn 18'000 clientas e clients, è ultra da quai vegnida realisada ina zona da spetga davant ils spurtegls. En connex cun la fatschenta da documents d'identitad ha la confedera-ziun (fedpol) fixà autas pretensiuns areguard ils standards da segirezza che ston vegnir observads en mintga cas, e quels dovran ina infrastructura correspundenta.

Per la planisaziun dal concept e da la realisaziun sco er per la concepziun è stà responsabel l'architect Andreas Gredig. Per la direcziun da construcziun èn stads responsabels Werner Mattle ed Erich Jäger. Las lavurs da construcziun èn vegnidas exequidas per gronda part tras interpresas da la regiun. Grazia al grond engaschi da tut las parts participadas han las lavurs pudì vegnir realisadas entaifer ils termins ed entaifer ils custs previs sco er en in'auta qualitad. Il project è vegnì manà en stretga collavuraziun cun l'UPDC (uffizi da fatgs da polizia e da dretg civil) sco utilisader e cun l'uffizi da construcziun auta.