Sin il pass dal Bernina ha l'uffizi da construcziun bassa dal Grischun, district 3, inaugurà oz uffizialmain la nova basa per il mantegniment da las vias.

L'uffizi da construcziun bassa (UCB) procura per il mantegniment da la via chantunala che maina sur il pass dal Bernina e che collia l'Engiadin'ota cun il Puschlav. Sin il pass dal Bernina cun ses punct culminant sin 2328 meters sur mar stat ussa a disposiziun als collavuraturs il nov edifizi da la basa per il mantegniment da las vias, che permetta al UCB, district 3, da prestar in servetsch da mantegniment da las vias effizient ed economic.

Sfida da tegnair avert il pass durant l'enviern
Fin ils onns 1960 era la via chantunala mintgamai serrada durant l'enviern pervia da l'aura extrema e pervia da las relaziuns da naiv. Suenter l'onn 1965 eran las vischnancas da Brusio e da Puschlav autorisadas da tegnair avert la via dal pass che fa part da la rait da vias chantunalas, durant l'entir onn, pia er durant l'enviern, per il traffic motorisà. Dapi l'onn 2007 è il chantun responsabel per il mantegniment durant l'entir onn e pia er per tegnair avert il pass durant l'enviern. Ils locals che vegnivan duvrads fin ussa per ademplir questas incumbensas na pudevan dentant betg pli satisfar a las pretensiuns d'ozendi ad in servetsch da mantegniment effizient ed economic da la via dal pass dal Bernina. Uschia è vegnida dada – la primavaira 2018 – l'emprima badigliada per ina nova basa per il mantegniment da las vias.

Resguardà la cuntrada particulara
Il lieu da la basa per il mantegniment da las vias sa chatta en l'intschess d'in dals 12 patrimonis mundials culturals da la UNESCO en Svizra. Il resultat d'ina concurrenza da projects da l'onn 2016 è vegnì realisà l'onn 2017 e terminà suenter in temp da construcziun da 16 mais. La natira cun sia topografia speziala furma la basa dal sboz ed è ina cumponenta dal project. La fatschada ondulada en betun natiral ed il silo liber defineschan da nov quest lieu sper la via dal pass dal Bernina curtamain avant ses culm. La disposiziun en furma d'in artg dals locals da la basa tecnica ha permess d'utilisar ina part da la cuntrada uschia, ch'igl ha stuì vegnir explotà uschè pauca crappa sco pussaivel u allontanà uschè pauc material sco pussaivel. Tut ils locals che sa chattan davos la fatschada ondulada èn cuvrids cun terra. La cuvrida cun terra restabilescha la topografia pregnanta. In accumpagnament da construcziun cun enconuschientschas da l'ambient e dal terren ha garantì ina renatiralisaziun cun success.
Tant la qualitad architectonica sco er la logica tecnica ed economica èn unidas en in project general cun ina gronda qualitad pratica. La construcziun da la nova basa per il mantegniment da las vias dat ina nova orientaziun futura a las relaziuns localas ed a las premissas per in servetsch da mantegniment da las vias effizient ed economic en il UCB, district 3. Il silo cun in volumen da tut en tut 400 meters cubic per sal e per glera garantescha al lieu il provediment per in servetsch d'enviern curunà da success.

Camera obscura – potenzial turistic
Sco attracziun accessibla a la publicitad pon visitadras e visitaders scuvrir – durant ils mais da stad – la cuntrada ord la perspectiva speziala da la camera obscura che sa chatta sin il silo. Poschiavo Turismo porscha mintgamai visitas guidadas d'ina mesa ura. La furma originara da la camera obscura – cun ina simpla fora en la paraid – permetta al contemplader da pertschaiver la projecziun tut speziala dal massiv dal Cambrena e dal Bernina en l'intern cilindric da la camera. La camera obscura ha pudì vegnir realisada grazia a contribuziuns d'instituziuns privatas e publicas.

Di da las portas avertas
Sonda, ils 5 d'october 2019, da las 10.00 fin las 15.00, pon ins visitar la basa per il mantegniment da las vias e la camera obscura.